وزیر خزانہ محمد اورنگزیب نے بین الاقوامی مالیاتی فنڈ (آئی ایم ایف) کے ساتھ جاری مذاکرات کے حوالے سے امید کا اظہار کیا ہے۔ وزیر خزانہ نے کہا کہ اب ائی ایم ایف کے ساتھ معاملات میں کوئی بڑی رکاوٹ باقی نہیں ہے اور جلد ہی مثبت خبروں کی توقع ہے۔
جمعہ کو لاہور میں ایک تقریب سے خطاب کرتے ہوئے وزیر خزانہ نے آئی ایم ایف مذاکرات اور موسمیاتی تبدیلی کے چیلنجز پر بات کی۔
آئی ایم ایف مذاکرات کے حوالے سے محمد اورنگزیب نے تصدیق کی کہ بات چیت اپنے آخری مراحل میں ہے اور تکمیل کے قریب ہے۔ انہوں نے پاکستان کی آئی ایم ایف کے معاشی ہدف پورا کرنے میں پیشرفت کو اجاگر کیا۔ انہوں نے زور دے کر کہا کہ حکومت معاہدے کو حاصل کرنے کے لیے فعال طور پر کام کر رہی ہے۔
وزیر خزانہ نے موسمیاتی تبدیلی کے پاکستان کے لیے سنگین خطرے پر بھی بات کی جس میں گلیشیئرز کے تیزی سے پگھلنے اور لاہور میں دھند کی کثرت سے ہونے والے معاشی خلل شامل ہیں۔ انہوں نے بتایا کہ موسم سرما میں کم بارش ایک سنگین مسئلہ ہے۔ انہوں نے یہ بھی بتایا کہ سیلاب سے متاثرہ منصوبوں کے لیے 10 ارب ڈالر کی امداد کا وعدہ کیا گیا تھا لیکن پاکستان کے قابل عمل منصوبے تیار نہ کرنے کی وجہ سے یہ رقم استعمال نہیں کی جا سکی۔
انہوں نے قابل عمل موسمیاتی مالیاتی منصوبوں کی ضرورت پر زور دیا اور یقین دلایا کہ وزارت خزانہ موسمیاتی تبدیلی کے مسائل کو حل کرنے کے لیے پرعزم ہے۔ انہوں نے عالمی بینک کے ساتھ شراکت داری میں مثبت پیشرفت کا بھی ذکر کیا جس میں مالی اعانت کے ساتھ ساتھ کیپسٹی بلڈنگ کو بہتر بنانے کی ضرورت پر زور دیا گیا۔
