بلوچستان حکومت نے پاکستان تحریک انصاف (پی ٹی آئی) کو 7 نومبر کو کوئٹہ میں جلسہ منعقد کرنے کی اجازت دینے سے انکار کر دیا ہے۔ سرکاری ذرائع کے مطابق یہ فیصلہ سیکیورٹی خدشات اور سنگین حفاظتی صورتحال کے پیش نظر لیا گیا ہے۔

انتظامیہ نے کوئٹہ شہر میں پہلے ہی دفعہ 144 نافذ کر رکھی ہے جس کے تحت پانچ سے زائد افراد کے ایک جگہ جمع ہونے پر سخت پابندی عائد ہے۔ حکام کا مؤقف ہے کہ سیکیورٹی کی سنگین صورتحال کے باعث کسی بھی سیاسی جماعت کو جلسے کی اجازت نہیں دی جا سکتی اور ناخوشگوار واقعے سے بچاؤ کے لیے حفاظتی اقدامات سخت کر دیے گئے ہیں۔

سرکاری ذرائع نے یہ بھی واضح کیا ہے کہ جلسے میں افغانیوں کی شرکت پر سخت کارروائی کی جائے گی۔ اگر کوئی افغان شہری جلسے میں شریک پایا گیا تو اسے فوری طور پر حراست میں لے کر 24 گھنٹوں کے اندر ڈی پورٹ کر دیا جائے گا۔ اس حوالے سے سیکیورٹی کا الرٹ بھی جاری کر دیا گیا ہے۔