این آیی ایچ په دې خبره تائید وکړو چې په سند کې دوه نوې د پولیو پېښې مخې ته راغلي دي. دغه پېښې د بدین او ټهټې په ضلعو کې رپورټ شوي دي. په دې سره په ټول ملک کې د پولیو د پېښو شمېره ۲۹ ته ورسېده او په سند صوبه کې یې شمېره ۹ ته ورسېده. دغه تازه پېښې د حیدرآباد د یوې پېښې نه څو ورځې وروسته مخې ته راغلي دي.
د پولیو په دغو تازه پېښو کې دوه ماشومې ناروغه شوي دي. په ۲۰۲۵ کال کې په صوبو کې د پولیو د پېښو شمېرې داسې دي: په خېبر پښتونخوا کې ۱۸، په سنده کې ۹، په پنجاب کې ۱ او په ګلګت بلتستان کې ۱ پېښه مخې ته راغلې ده.
پاکستان او افغانستان په هغو دوو ملکونو کې شامل دي چې پولیو پکې اوس هم شته. د وایرس د ختمولو په کوششونو کې د سکیورټي مسلو د ویکسین نه د پرهېز او غلط معلوماتو په وجه خنډونه شته.
د NIH د معلوماتو مطابق په روانه میاشت کې په ۸۸ ضلعو کې د پولیو فرعي قامي کیمپین شوی و. چې پکې د پنځو کلونو نه کم عمر لرونکو ۲۱ میلینه ماشومانو ته قطرې ورکړل شوې.
د پولیو راتلونکی قامي کیمپین د اکتوبر له ۱۳ نه تر ۱۹ پورې کېږي. په دې کیمپین کې به ۴۵.۴ میلینه ماشومانو ته د پولیو قطرې ورکول کېږي. په دې کیمپین کې به ماشومانو ته د پولیو ویکسین سره ویټامن اې هم ورکول کېږي تر څو د دوی د ناروغیو خلاف قوت زیات شي. د ۴ لاکه نه زیات کارکوونکي به کور په کور ګرځي او ماشومانو ته به ویکسین ورکوي.
پولیو یوه ډېره خطرناکه او نه خلاصېدونکې ناروغي ده چې ټول عمر فالج (معذوري) جوړولای شي. د دې نه د بچ کېدو یوازینۍ لاره دا ده چې د پنځو کالو نه کم عمر لرونکو هر ماشوم ته د پولیو قطرې بار بار ورکړل شي او نور ضروري واکسینونه هم پر وخت مکمل شي. له والدینو او ساتونکو نه غوښتنه شوې چې دوی دې خپلو ماشومانو ته د پولیو ټول تجویز شوي خوراکونه ورکړي.
په تېر ۲۰۲۴ کال کې په ملک کې ۷۱ د پولیو پېښې رپورټ شوي وې او وایرس په تقریباً ۹۰ ضلعو کې موجود و.
