د ۲۰۲۵ کال د جولای پر ۲۸مه د ګل (دوشنبې) په ورځ د کراچۍ په منګوپیر سیمه کښې د ترهګرۍ ضد عملیاتو پر مهال د تحریک طالبان پاکستان (TTP) درې ترهګر ووژل شول. په وژل شویو کښې هغه کس هم شامل دی چې د ۲۰۲۴ کال په نومبر کښې یې پر چینایي انجینرانو د برید پلان جوړ کړی و. د ترهګرۍ ضد څانګې (CTD) چارواکو ویلي چې دا عملیات د استخباراتي ادارو سره په ګډه تر سره شوي دي.

د وژل شوي بریدګر نوم زعفران ښودل شوی دی. دوه نور ملګري یې هم په منګوپیر کښې پر یوه کور د برید پر مهال وژل شوي دي. د ۲۰۲۴ کال په نومبر کښې د چینایي انجینرانو پر یوه ټوکر جوړولو فابریکه (Textile Mill) په سایټ (SITE) سیمه کښې برید شوی و. چې له امله یې دوه چینایي وګړي ټپیان شوي وو. په پیل کښې داسې ویل کېدل چې دا پېښه د انجینرانو او یوه ساتونکي تر منځ د لفظي شخړې له امله رامنځته شوې وه. خو وروسته څېړنو وښوده چې دا د TTP له خوا یو پلان شوی برید و.

دا پېښه په پاکستان کښې د چینایي وګړو او پروژو په اړه روانې امنیتي ستونزې په ګوته کوي. په ځانګړې توګه د ۲۰۲۲ کال په نومبر کښې د اوربند له پای ته رسېدو وروسته د TTP فعالیتونو زیاتوالی د دې اندېښنو لامل شوی دی. د ترهګرۍ ضد ملي ادارې (Nacta) په ۲۰۲۴ کال کښې په یوه راپور کښې ویلي وو چې له ۲۰۲۱ کال راهیسې په ترهګریزو بریدونو کښې ۲۰ چینایي وګړي وژل شوي او ۳۴ ټپیان شوي دي.

دا وروستي عملیات په وروستیو کلونو کښې پر چینایي وګړو د څو مهمو بریدونو وروسته ترسره کیږي. د تاوتریخوالي زیاتوالي په بیجینګ کښې اندېښنې راپورته کړي. په ځانګړې توګه د چین-پاکستان اقتصادي دهلیز (CPEC) پروژو د پرمختګ په اړه ډیرې اندیښنې راولي.