د پاکستان د پوځ د عامه اړیکو څانګې (ISPR) په وینا، د سپتمبر په ۲۶ او ۲۷ د شپې د امنیتي ځواکونو لخوا د لکي مروت ولسوالۍ په سیمه کې د استخباراتي معلوماتو پر بنسټ ځانګړي عملیات ترسره شوي دي.

د آئی ایس پی آر په وینا، دغه وسله‌وال د “فتنه الخوارج” ډلې سره تړاو لري، او دوی د هند لخوا د ملاتړ کېدونکي پراکسي ډلې په توګه یاد شوي دي.

په عملیاتو کې امنیتي ځواکونو د وسله‌والو پر پټن‌ځایونو مؤثر بریدونه وکړل، چې په پایله کې یې ۱۷ د هند ملاتړ لرونکي “خوارج” وژل شوي دي. د وژل شوو ترهګرو له قبضې څخه زیات شمېر وسلې او مهمات هم ترلاسه شوي دي.

د آئی ایس پی آر له مخې، دا عناصر د امنیتي ځواکونو، د قانون پلي کوونکو ادارو، او بې‌ګناه ولسي خلکو پر ضد په ګڼو ترهګریزو فعالیتونو کې ښکېل وو.

په بیان کې دا هم ویل شوي چې په سیمه کې د نورو پاتې هند پلوه “خوارجو” د له‌منځه وړلو لپاره د سیمې د پاکولو عملیات دوام لري.

د پاکستان امنیتي ځواکونو ژمنه کړې چې د هند لخوا د ملاتړ کېدونکې ترهګرۍ به له بیخه ختموي.