د ډی پی او هنګو خان زیب مهمند تر څارنې او د ډی آی جي کوهاټ ریجن عباس مجید خان مروت په خاص لارښوونو دوابې پولیسو په یوه مهم عملیات کې د ترهګرۍ یو ستر پلان شنډ کړی دی. په دغه عملیات کې ډېرې وسلې او چاودیدونکي توکي نیول شوي دي.
د پولیسو د معلوماتو له مخې د ۲۰۲۵ کال د ستمبر په ۲۲ مه د درسمند په عظیم آباد سیمه کې د ایس پي تحقیقاتو عبدالصمد خان په مشرۍ ډی ایس پی ټل مجاهد خان او د دوابې تاڼې ایس ایچ او عمران الدین خان له البرق کمانډوز او پولیسو سره یو خاص عملیات ترسره کړو. په دغه عملیات کې د عظیم آباد اوسیدونکی عمر د محمد امین زوی نیول شوی. چې له هغه څخه د ترهګرۍ په کارونو کې کاریدونکې وسلې او نور توکي ترلاسه شوي دي.
په ترلاسه شویو وسلو کې یو ایل ایم جي (مشین گن)، یو ایم فور رایفل، درې ریپیټر رایفلونه، یو ۳۰۳ بور رایفل، او درې ۳۰ بور پستول شامل دي. د دې نه علاوه څلور لاسي بمونه، پنځه سیفټي فیوزونه، درې پریشر کوکرونه، دوه دوربینونه، ۱۴ مېګزینونه، ۲۷۲ د مختلف بور مرمۍ، او دوه کیموفلیج یونیفارمونه هم ترلاسه شوي دي.
ډی پی او هنګو خان زیب مهمند په دې موقع وویل چې زمونږ پولیس د سولې د دښمنانو لپاره یو روښانه پیغام لري چې په هنګو کې د هیڅ مجرم او یا ترهګر لپاره ځای نشته. د هغوی شبکه به په مکمله توګه له منځه یوړل شي او هیڅوک به له قانون څخه خلاص نه شي. هغه زیاته کړه چې هغه کسان چې د خلکو ژوند او مال ته زیان رسوي، په کلکه به وځپل شي. دا عملیات زمونږ د دې ارادې عملي ثبوت دی.
ډی پی او له خلکو غوښتنه وکړه چې له پولیسو سره همکاري وکړي او د هر ډول شکمن فعالیت په اړه سمدستي خبر ورکړي. هغه وویل چې ستاسو پر وخت معلومات کولی شي د یوې سترې ترهګرۍ مخه ونیسي. د خلکو همکاري د سولې او ثبات په ساتلو کې تر ټولو لویه وسله ده.
