په بلوچستان کښې د مستونګ په ضلعي کښې د جمعې په ورځ د بلوچستان کنستېبلرۍ پر یو کاروان برید شوی دی. په دې برید کښې یو افسر وژل شوی او درې نور ټپیان شوي دي. د صوبايي حکومت ویاند شاهد رند ویلي چې ناپېژانده وسله والو د چاټو سیمې ته نږدې پر ملي لویه لاره پر دغه موټر ډزې کړې دي.
لومړني راپورونه ښيي چې دا موټر د پولیسو د سرپرست مرستیال سپرنټنډنټ (DSP) و. ټپي شوي افسران سمدستي د درملنې لپاره کویټې ته د شهید نواب غوث بخش روغتون ته لېږدول شوي دي. اوس مهال د بریدګرو د نیولو لپاره پلټنې روانې دي او امنیتي ځواکونه سیمې ته رسېدلي دي.
دا برید په بلوچستان کښې پر امنیتي ځواکونو د وروستیو بریدونو یوه برخه ده. د اپرېل په میاشت کښې هم د مستونګ پر دشت روډ د بلوچستان کنستېبلرۍ پر یوه موټر چاودنه شوې وه. چې درې پولیس یې وژلي وو او لږ تر لږه ۱۶ نور یې ټپیان کړي وو.
په نورو وروستیو بریدونو کښې د جولای په ۱۶ مه په قلات کښې پر یوه مسافر وړونکي بس برید شامل دی. چې درې کسان پکې وژل شوي او اوه نور ټپیان شوي وو. همدارنګه د روانې میاشتې په پیل کښې په نصیر اباد ضلعي کښې پر یوه هایوې پولیسو موټر برید شوی و چې درې افسران پکې ټپیان شوي وو.
