د بلوچستان صوبې په مستونګ ضلع کښې د بلوچستان کانسټبلري پر موټر بمي برید وشو. چې لږ تر لږه درې چارواکي پکې ووژل شول.
دا چاودنه د سه شنبې په سهار د مستونګ په دشت سړک د کند مهسوري په سیمه کښې وشوه. چاودېدونکي توکي په یوه موټر سایکل کښې ځای پر ځای شوي وو او د ریموټ کنټرول په واسطه وچول شول.
په دې برید کښې لږ تر لږه درې چارواکي ووژل شول او دوه نور سخت ټپیان شول.
دا چارواکي د لکپاس سره نږدې د بلوچستان نیشنل پارټی په پرلت کښې ګمارل شوي وو او له دندې څخه بیرته راستنیدل چې برید پرې وشو.
ټپیان کویټې ته لیږدول شوي دي. چیرې چې د بولان میډیکل کالج او سیول روغتون کښې بیړنی حالت نافذ شوی دی.
د بلوچستان وزیراعلیٰ سرفراز بګټي دا برید وغانده او د روغتیا وزیر بخت کاکړ ته یې امر وکړ چې ټپیانو ته د مناسبې طبي پاملرنې ډاډ ورکړي.
