د بهرنیو چارو وزارت د افغانستان له لنډمهاله حکومت څخه وغوښتل چې د پاکستان پر ضد فعالیت کوونکو ترهګرو ډلو په شمول د بلوچستان ازادۍ پوځ (BLA) ته خپله خاوره د استعمال اجازه ورنکړي.
د پنجشنبې په ورځ په هفته وارې مطبوعاتي کانفرنس کښې د بهرنیو چارو وزارت ویاند سفیر شفقت علي خان وویل چې پاکستان د هغو ترهګرو بریدونو قرباني شوی دی چې زمونږ له پولو بهر فعالیت کوونکو بدخواهانو لخوا پلان شوي، تمویل شوي او تنظیم شوي دي.
هغه وویل: په بلوچستان کښې پر جعفر ایکسپریس وروستی ترهګریز برید هم د هغو ترهګرو مشرانو لخوا تنظیم او لارښوونه شوې وه چې له بهر څخه فعالیت کوي. هغه زیاته کړه چې ترهګر د پیښې په اوږدو کښې په افغانستان کښې میشتو پلان جوړونکو سره مستقیمه اړیکه کښې وو.
هغه زیاته کړه چې په سیمه کښې ډیر د سولې مخالفین شته چې نه غواړي پاکستان د ترهګرۍ د مخنیوي او د سولې د سیمې د جوړولو لپاره د خپلو بې ساري او صادقانه هڅو ګټې ترلاسه کړي.
هغه زیاته کړه چې پاکستان په وار وار له افغان لنډمهاله حکومت څخه غوښتي دي چې د BLA په څیر ترهګرو ډلو ته د پاکستان د برید لپاره خپله خاوره د استعمال اجازه ورنکړي.
سفیر شفقت علي خان وویل چې مونږ له افغانستان څخه غوښتنه کوو چې د دې ناوړه ترهګریز عمل عاملین، تنظیمونکي او تمویلوونکي حساب ورکوونکي وګرځوي او د پاکستان له حکومت سره همکاري وکړي ترڅو په دې برید کښې ټول ښکیل کسان، په شمول اصلي ذمه وار ترهګر، عدالت ته راوړي.
د بهرنیو چارو وزارت دا څرګندونې وروسته له هغې وکړې چې امنیتي ځواکونو د جعفر ایکسپریس څخه د ترهګرو لخوا نیول شویو یرغمل شویو د بیرته ترلاسه کولو لپاره عملیات ترسره کړل. په دې برید کښې ټول ۳۳ ترهګر ووژل شول. خو ۲۱ مسافر او څلور سرتیري هم په دې برید کښې ووژل شول. د دې برید ذمه وارۍ بلوچستان ازادۍ پوځ بی ایل ای په غاړه واخیسته.
