د ګل (دوشنبې) په ورځ په ګلګت کښې د دنیور په ناله کښې د ترمیم کار پر مهال د ځمکې ښویدنې له امله یوه لویه پیښه رامنځته شوه. چې له امله یې اوه ځايي رضاکاران مړه او اوه نور ژوبل شول. سیمه ییزو خلکو خبرکده ته وویل چې دا رضاکاران د سیلاب له امله ویجاړه شوې د اوبو هغه لښتی بحالوله چې له تیرو څلورو ورځو راهیسې بند و. د معلوماتو له مخې ژوبل شوي کسان سمدستي نږدې روغتونونو ته یوړل شول چیرته چې دوی ته طبي مرستې ورکول کیږي.
د سیمه ایزو سرچینو په وینا د پولیسو د ژغورنې عملیاتو په جریان کښې څلور کسان په خراب حالت کښې له خاورو او ډبرو څخه را وویستل شول. د گلگت بلتستان د حکومت ویاند فیض اللہ فراق وویل چې د ژغورنې عملیات شروع شوي دي. دا خواشینونکې پیښه هغه مهال وشوه کله چې د شپې په ۲ بجو ناڅاپه د خاورو او ډبرو یوه لویه برخه د ۱۵ کسانو پر سر راوغورځیده.
په ټول هیواد کښې د وروستیو موسمي بارانونو له امله ډیر زیانونه رامنځته شوي چې په پایله کښې یې سلګونه کسان مړه شوي دي. گلگت بلتستان هم سخت زیانمن شوی دی.
وزیراعظم شهباز شریف تیره اونۍ گلگت بلتستان ته سفر وکړ او د سیلاب ځپلو ته یې د امدادي کڅوړې په چوکاټ کښې د تاوان چکونه وویشل. وزیراعظم د زیانمن شوي پراجيکټ د سمدستي بحالۍ لارښوونه کړې ده. وزیراعظم وویل چې پاکستان یو له هغو هیوادونو څخه دی چې د موسمي بدلونونو له امله تر ټولو ډیر زیانمن شوی او په راتلونکي کښې د داسې پیښو څخه د مخنیوي لپاره یو عصري پرمختللي خبرداري سیسټم ته اړتیا ده.
