وفاقی حکومت اعلان کړی دی چې د امریکا د سفر نوي بندیزونه به یوازې د ناقانونه ډلو پورې تړلي خلک متاثر کړي.
د قانون او انصاف وزیر مملکت بیرسټر عقیل د یکشنبې په ورځ د یو شخصي ټلویزیون په مرکه کښې وویل چې د پاکستاني وګړو پر امریکا د سفر بشپړ بندیز پلان نشته.
هغه ډان نیوز ته وویل چې دا امکان نلري چې د پاکستاني وګړو پر امریکا سفر کولو عمومي بندیز ولګول شي.
هغه زیاته کړه چې حکومت د ممنوع ډلو لیسټ تازه کوي او د بهرنیو چارو وزارت هم داسې کولو احتمال لري. بیرسټر عقیل وویل چې له هغې وروسته به یوازې د ناقانونی ډلو پورې تړلي خلک د سفر بندیز یا د ویزې کینسل کیدو په څیر اقداماتو سره مخ شي.
سفیر رضوان شیخ تایید کړې ده چې هغه د بندیز راپورونه لیدلي دي خو تر اوسه پورې هیڅ شی په رسمي ډول ندي نهایی شوی. په امریکا کښې د پاکستان سفارت د بندیز راپورونو په اړه د امریکا د بهرنیو چارو له وزارت سره اړیکه نیولې ده خو تر اوسه پورې هیڅ تایید ندی ترلاسه شوی.
په دې وروستیو کښې راپورونه خپاره شوي وو چې د امریکا کابینې د هغو هیوادونو د مسافرو د بندیز لپاره وړاندیزونه غوښتي دي چې د ویزې لپاره مناسب تفتیش سیسټم نلري. دا پریکړه په امریکا کښې د داخلیدونکو کسانو د امنیت څارنې د زیاتولو لپاره شوې ده. خو بیا هم د هیوادونو لیسټ لا تر اوسه ندی جوړ شوی. خو رویټرز خبري ایجنسی دعوه کړې وه چې پاکستان او افغانستان ممکن په دې لیست کښې شامل شي.
د ټرمپ ادارې په ۲۰۱۸ کښې د اوو مسلمان میشته هیوادونو مسافرو باندې بندیز ولګاوه. خو دا بندیز بالاخره په ۲۰۲۱ کښې د ولسمشر جو بایډن لخوا ختم شو.
