پاکستان د نومبر په ۶مه د استنبول په ښار کې له افغان طالبانو سره د ترسره شویو خبرو په اړه خپل لومړی رسمي غبرګون څرګند کړی او دا یې روښانه کړې ده چې له افغانستانه د پاکستان پر ضد ترسره کېدونکې ترهګري د دواړو ترمنځ د خبرو اصلي موضوع ده.

د پاکستان د بهرنیو چارو وزارت په خپل بیان کې ویلي دي چې افغان لوری د تحریک طالبان پاکستان (TTP) او بلوچستان لبریشن آرمي (BLA) په څېر د بندیز لګېدلو ډلو پر ضد د عملي اقداماتو په ترسره کولو کې پاتې راغلی، حال دا چې یادې ډلې له اوږدې مودې راهیسې د افغانستان له خاورې څخه پر پاکستان بریدونه کوي.

پاکستان ټینګار کړی چې هغه تل د زور یا پوځي عمل کارول وروستی انتخاب ګڼي، خو د طالبانو حکومت د لنډمهالې اوربند د غځولو هڅې کوي، په داسې حال کې چې د ترهګرو عناصرو پر ضد د تصدیق وړ او عملي اقدام څخه ډډه کوي.

د بهرنیو چارو وزارت ویلي، پر ځای د دې چې افغان لوری د پاکستان بنسټیز امنیتي اندېښنې له منځه یوسي، په بې‌فايدو بحثونو او تورونو کې ښکېل شوی او د واضحو پایلو تر لاسه کولو هڅې یې ټکنۍ کړې دي.

پاکستان یو ځل بیا څرګنده کړې چې هغه د افغانستان له خاورې د راولاړېدونکې ترهګرۍ د مخنیوي په خپل عزم ټينګ ولاړ دی.

د قطر او ترکیې منځګړتوب

پاکستان د ترکیې او قطر د منځګړتوب هڅې ستایلې دي، چې د راپورونو له مخې، د اسلام‌اباد د دې دریځ ملاتړ کوي چې د پاکستان پر ضد ترهګري باید ختمه شي.

سرچینو تایید کړې چې افغانستان د دې تحریري ضمانت له ورکولو انکار کړی چې د هغه خاوره به د پاکستان پر ضد د بریدونو لپاره نه کارېږي — دا هغه غوښتنه وه چې د پاکستان له‌خوا بنسټیزه بلل شوې وه.

د بریدونو زیاتوالی

د بهرنیو چارو وزارت ویاند ویلي، له هغه وخت راهیسې چې طالبان واک ته رسېدلي، د افغان خاورې څخه پر پاکستان ترهګریز بریدونه په چټکۍ سره زیات شوي دي.

ویاند ټینګار وکړ چې TTP او BLA د پاکستان ښکاره دښمنان دي، او هر څوک چې له دغو ډلو ملاتړ کوي، د پاکستان دوست نه شي ګڼل کېدای.

منځګړتوب او راتلونکي ګامونه

په همدې مهال، د ترکیې ولسمشر رجب طیب اردوغان ویلي چې د ترکیې د بهرنیو چارو وزیر، د دفاع وزیر او د استخباراتو مشر به راتلونکې اوونۍ پاکستان ته سفر وکړي، څو دایمي اوربند ته د رسېدو هڅې وکړي.

د دیپلوماټیکو سرچینو په وینا، د ایران د بهرنیو چارو وزیر سید عباس عراقچي د پاکستان د بهرنیو چارو وزیر اسحاق ډار او د افغانستان د بهرنیو چارو وزیر امیرخان متقي سره اړیکه نیولې او ویلي یې دي چې ایران چمتو دی د دواړو هېوادونو ترمنځ د تفاهم او سولې لپاره هر ډول مرسته وکړي.