جمعیت علمائے اسلام په پېښور کې یو جرګه جوړه کړه چې پکې یې په خیبر پښتونخوا کې د سولې راوستلو لپاره د خبرو اترو او د پخوانیو قبایلي سیمو لپاره د اقتصادي پرمختیايي پروژو غوښتنه وکړه. جرګې د افغانستان سره د لارو د پرانستلو غوښتنه هم وکړه. دا جرګه د “پښتون قومي فاټا مشورتي جرګه” تر عنوان لاندې د پېښور په نېشتر هال کې جوړه شوې وه او پکې یې د پخوانیو فاټا او ورڅېرو سویلي ضلعو قبایلي مشران ور بللي وو
جرګه د ۱۱ ټکو په یوه اعلامیه سره پای ته ورسېده چې پکې یې په خیبر پښتونخوا کې د ترهګرۍ د ختمولو لپاره د خبرو اترو غوښتنه شوې وه ځکه چې د زور کارول هیڅ نتیجه نه ده ورکړې. اعلامیه کې دا هم ویل شوي وو چې حکومت باید د ترهګرۍ ضد عملیاتو په پلمه د قبایلي سیمو د خلکو پر ضد فعالیتونه ودروي.
دا هم غوښتنه شوې وه چې له افغانستان سره دې سوداګریزې او مسافرو لارې سمدستي پرانیستل شي. اعلامیه کې ویل شوي وو چې د افغانستان او پاکستان تر منځ تګ راتګ باید اسان شي او زاړه تجارتي لارې لکه باجوړ، شمالي او جنوبي وزیرستان، خیبر او کرم باید بیا پرانیستل شي.
اعلامیه کې په قبایلي سیمو کې د بنسټیزو اسانتیاوو د نشتوالي په اړه اندېښنه هم څرګندې شوې وه او له حکومته یې وغوښتل چې د دوی د پرمختګ لپاره دې د هېواد د نورو برخو په څېر ګامونه واخلي.
جرګې دا هم وغوښتل چې حکومت دې سمدستي هغه پیسې ورکړي چې د خیبر پښتونخوا له خلکو سره یې ژمنه کړې وه او همدارنګه دې هغو کسانو ته تاوان ورکړل شي چې د ترهګرۍ ضد عملیاتو کې یې مالونه له لاسه ورکړي دي.
اعلامیه کې دا هم غوښتل شوي وو چې د خیبر پښتونخوا څخه ترلاسه کېدونکي سرچینې دې د پښتنو د پرمختګ لپاره ولګول شي او په کرنه او وارداتو باندې ظالمانه مالیات دې لغوه کړل شي.
جرګې دا پرېکړه هم وکړه چې مولانا فضل الرحمن به د پښتنو سیاسي ګوندونو یوه ټول ګوندیزه غونډه راوبللي ترڅو په سیمه کې د سولې لپاره یوه لار وموندل شي.
دا جرګه وروسته له هغې کېږي چې په کرک کې یوه بله سوله ایزه جرګه شوې وه او له حکومته یې غوښتي وو چې د ترهګرۍ پر ضد دې قاطع ګامونه واخلي. له جرګې یوه ورځ وروسته، د ترهګرۍ ضد څانګې عملیات وکړل او په کرک کې یې د بانډه داود په سیمه کې پنځه ترهګر ووژل.
