فدرالي وزير د قانون اعظم نذير تارړ د شنبې په ورځ له رسنيو سره د خبرو پر مهال اعلان وکړ چې د ۲۷مې آئيني ترميم مسوده نن د پارلمان د سينيټ (ایوانِ بالا) ته وړاندې کېږي.

نوموړي وويل، دا پرېکړه د وزيراعظم شهباز شريف په مشرۍ د وفاقي کابينې په غونډه کې وشوه، چې پکې وزيراعظم له باکو (آذربايجان) څخه د ويډيو لنک له لارې ګډون کړی و.

د ترميمي مسودې مهم ټکي

وزير قانون څرګنده کړه چې د تفصيلي مشورې وروسته په هغو ټکو اتفاق شوی، چې له مخې به د ميثاقِ جمهوريت د پخواني ژمنې مطابق يوه جلا وفاقي آئيني محکمه جوړيږي، او د دې موضوع په اړه به پارلمان بحث وروسته پرېکړه وکړي.

نوموړي زياته کړه، د قاضيانو د بدلون يا منتقلي موضوع به د پاکستان د قضايي کمېشن (Judicial Commission of Pakistan) ته وسپارل شي. د مسودې له مخې به د هغه هائي کورټ د چیف جسټس سره هم مشوره کېږي، له کومه ځایه چې جج منتقلېږي، او د هغه هائي کورټ له چیف جسټس سره هم چېرې چې منتقلېږي.

د خيبرپښتونخوا د سينيټ انتخاباتو ستونزه

وزير وويل، د خيبرپښتونخوا په سينيټ انتخاباتو کې د عدالتي پرېکړو له امله رامنځته شوې ستونزه به د آئيني ترميم له لارې هواره شي، څو هغه غړي چې د شپږ کلنې مودې يوه برخه يې ضايعه شوې، بيا هم د غړو په توګه وپېژندل شي، او راتلونکي سينيټ انتخابات په ټول هېواد کې يو وخت ترسره شي.

د صوبو غوښتنې او نوې وړانديزونه

اعظم نذير تارړ وويل، د کوچنيو صوبو خيبرپښتونخوا او بلوچستان د غوښتنو په اساس د صوبايي کابينې حد د ۱۱ سلنې څخه ۱۳ سلنې ته د زياتېدو وړانديز شوی، او د مشيرانو شمېر له پنځه اوو ته لوړولو تجويز هم د مسودې برخه ده.

د وسله‌والو ځواکونو اړوند بدلونونه

وزير زياته کړه چې د وسله‌والو ځواکونو د کمانډ او کنټرول اړوند د آرټيکل ۲۴۳ کې هم بدلونونه راوړل کېږي. د ده په وينا، د فيلډ مارشل د عهده او رول ارزونه به وشي، او د ملي اتلانو ته ورکړل شوي رتبې يا اعزازونه به د تل لپاره د ساتنې وړ وګرځول شي.

سياسي غبرګونونه او مخالفتونه

د مجوزه ترميمي بل وړاندې کېدو سره سم، د وکيلانو او سياستوالو له خوا پرې سخته نيوکه شوې. د دوی په وينا، دا هڅه د ۱۸مې آئيني ترميم له مخې صوبو ته ورکړل شوي واکونه بېرته اخيستل دي.

پاکستان پيپلز پارټۍ (PPP) د آرټيکل ۲۴۳ ترميم ملاتړ کړی، خو د NFC ايوارډ او د ۱۸مې ترميم د شاتګ (rollback) وړانديز يې رد کړی. دغه ګوند د جلا آئيني محکمې د جوړېدو ملاتړ کوي.

تحريک انصاف (PTI) د مجوزه ترميمونو مخالفت کړی او ويلي يې دي چې دا “په پارلمان بريد” دی. دغه ګوند د نفوس، تعليم او نورو برخو د واکونو بېرته فدرال حکومت ته سپارلو سخت مخالفت کړی دی.

ايم‌کيو‌ايم پاکستان (MQM-P) غوښتنه کړې چې د ۲۷مې ترميم په مسوده کې دې د خپلواکو او پياوړو بلدياتي ادارو د جوړېدو لپاره د دوی وړانديزونه هم شامل کړل شي.

جمعيت علما اسلام (ف) بيا ويلي، دوی به د هرې هغې ترميمي مسودې مخالفت کوي چې د ۱۸مې ترميم تر چتر لاندې د صوبو واکونه محدود کړي.

د منظوري قانوني تقاضې

د دې ترميم د منظورېدو لپاره به د پارلمان د دواړو اېوانونو څخه د دوو پر درېيمه برخه اکثريت ته اړتيا وي.

وزير قانون زياته کړه، د سينيټ په کميټه کې به د ايم‌کيو‌ايم پاکستان له لوري وړاندې شوی بل هم وڅېړل شي، کوم چې د آرټيکل 104A د بدلون اړوند له وړاندې د بحث لاندې دی