د شنبې په ورځ The News راپور ورکړی چې د ترکيې لوړپوړی پلاوی به راتلونکې اوونۍ اسلام‌اباد ته ورشي څو د پاکستان او په کابل کې د طالبانو تر مشرۍ لاندې حکومت ترمنځ خرابېدونکې اړیکې ارامې کړي. د دې نوښت هدف د سولې لپاره د خبرو اترو هڅول او د سیمه‌ییزو ترینګلتیاوو په منځ کې د حل پر لارو غور کول دي.

په پاکستان کې د ترکيې سفیر ډاکټر عرفان نزیروغلو دا پرمختګ د عمان د ملي ورځ په مناسبت د عمان د سفیر فهد سلیمان خلف الخروصي لخوا جوړ شوي رسمې مراسمو کې له The News سره په خبرو کې تأیید کړ. هغه ټینګار وکړ چې انقره حالات له نږدې څاري او چمتو ده چې رغنده منځګړیتوب وکړي.

د دې احتمالي سفر یادونه لومړی ځل هغه مهال وشوه کله چې د ترکيې ولسمشر رجب طیب اردوغان د اذرابایجان په باکو کې له وزیر اعظم شهباز شریف سره ولیدل. دا سفر د پاکستاني او افغاني چارواکو ترمنځ په استانبول کې له څو غونډو وروسته کېږي، کومې چې د نومبر په لومړیو کې بې له کومې بریا پای ته ورسېدې، ځکه کابل نه غوښتل د هغو وسله‌والو ډلو پر ضد اقدام وکړي چې له افغان خاورې څخه عملیات کوي.

سفیر نزیروغلو، چې د افغانستان په اړه د استانبول درې اړخیزو مشورو په اسانتیا کې مهم رول لرلی، څرګنده کړه چې راتلونکی پلاوی به د ترکيې د استخباراتو مشر او د کابینې مهم غړي پکې شامل وي. د هغوی په منځ کې به د ترکيې د انرژۍ وزیر، الپارسالان بایراکتار هم وي، چې ټاکل شوې ده راتلونکې اوونۍ اسلام‌اباد ته سفر وکړي.

نزیروغلو وویل ترکيه غواړي ډاډ ترلاسه کړي چې د افغانستان خاوره د پاکستان پر ضد په جګړې یا دښمنۍ کې نه کارول کېږي. هغه ټینکار وکړ چې دواړه هېوادونه باید د ورورولۍ په روحیه سوله ییز ګډ ژوند ولري او زیاته یې کړه چې ترکيه د تاوتریخوالي د مخنیوي لپاره د هرې هڅې بشپړه ملاتړ کوي.

ترینګلتیا هغه مهال لوړه شوه کله چې د اکتوبر په ۱۲مه د طالبانو ځواکونو د هند له ملاتړ لرونکې تحریک طالبان پاکستان (TTP)، چې د فتنۀ الخوارج په نوم هم یادیږي، په همغږۍ سره په پاکستان غیرې تحرېکي برید وکړ. د پاکستان پوځ د ځان‌ساتنې په ځواب کې سخت عملیات ترسره کړل او له ۲۰۰ څخه زیات د افغان طالبانو او اړوند ډلو جنګیالي یې له منځه یوړل. د ISPR له خوا وروسته تایید شوه چې په دې نښتو کې ۲۳ پاکستاني سرتېري شهیدان شول.

تر برید وروسته، پاکستاني ځواکونو د افغانستان په کندهار، کابل او د شمالي او جنوبي وزیرستان په پوله کې هدفمند بریدونه ترسره کړل او د وسله‌والو څو مرکزونه یې ونړول. که څه هم دواړو خواوو د اکتوبر په ۱۹مه د دوحې خبرو پر مهال پر لنډمهالې اوربند موافقه وکړه او وروسته یې نورې ناستې په استانبول کې وکړې، خو پرمختګ ودرېد. پاکستاني چارواکو وویل چې افغان لوری انعطاف نه درلود او د استانبول ناستو کې یې د اصلي ستونزې — د افغانستان له خاورې د سرحدي ترهګرۍ د حل پر ځای اسلام‌اباد ته نیوکې کولې.