د ملي سايبر جرمونو څېړنې ادارې (NCCIA) د خيبر پښتونخوا وزیراعلي محمد سهیل آفریدی پر ضد مقدمه درج کړې ده. پر هغه تور دی چې په ټولنیزو رسنیو یې د “ریاستي ادارو پر ضد دروغ، مغشوش کوونکي او سپکاوي کوونکي” مواد خپاره او ترویج کړي دي.

د مقدمې له مخې، هغه ښایي د یوټیوب چینل ‘پاکستان تحریک انصاف آفیشل’ (@PTIOfficialPK) په خپرولو کې دخیل و، او پر هغه د الیکټرانیکي جرمونو د مخنیوي قانون ۲۰۱۶ د مادو ۱۱، ۲۰ او ۲۶-A لاندې مقدمه (شمېره ۳۱۰/۲۰۲۵) ثبت شوې ده.

د ایف آی آر په وینا، محمد سهیل په قصدي ډول دروغ او بې اساسه تورونه لگولي، چې موخه یې د پاکستان د ریاستي ادارو د شهرت خرابول وو. څېړونکو دا د “عوامي باور ته زیان رسول، اندېښنې خپرول او ملي امنیت کمزوری کول یوه منظمه هڅه” بللې ده.

په ورته وخت کې، د وفاقي تحقیقاتي ادارې (FIA) انټي کرپشن سرکل (ACC) د NCCIA د لوړ پوړو افسرانو پر ضد د کروړونو روپیو په رشوت او باج اخیستنې تورونو په تړاو مقدمه درج کړې ده. د تحقیقاتو له مخې، دغه شبکه د چینایي اتباعو د غیرقانوني کال سنټرونو سره تړلې وه.

د دواړو قضیو تحقیقات لا تر اوسه روان دي.