د خیبر پښتونخوا د اورکزۍ ولسوالۍ د لوئر سرکل په حدودو کې، د بابړکي، مرعیو چن، او عثمان خېل په سیمو کې د “فتنہ الخوارج” ترهګرو د پټنځایونو د موجودیت د پټ اطلاع له ترلاسه کېدو وروسته، د اورکزۍ د پولیسو ضلعي مشر شوکت علي تر مستقیمې څارنې لاندې یو لوی سرچ اینډ سټرائیک (پلټنې او برید) عملیات په بریالیتوب سره ترسره شو.
د دې مهم عملیاتو مشري د لوئر اورکزۍ ډياېسپي محبوب خان کوله، چې ورسره انسپکټر فاروق خان، د کلایه او کريز تاڼو مرستیال ایساېچاوګان هم ملګري وو. په عملیاتو کې د ضلعې پولیسو سرتېرو تر څنګ د ایلیټ کمانډوزو ځانګړې ډلې هم فعاله برخه اخیستې او لوړه مسلکي وړتیا یې وښوده.
د پلټنې پر مهال د ترهګرو مشکوک پټنځایونه په مؤثره توګه له منځه یووړل شول او وسوځول شول. د اورکزۍ پولیسو سیمه سمدستي کلابنده کړه او د کلیرنس (پاکولو) عملیات یې د سختې څارنې لاندې دوام ورکړ. د چارواکو په وینا، له بریالي عملیات وروسته د بابړکي، مرعیو چن، او عثمان خېل سیمې بشپړې پاکې اعلان شوې دي.
د عملیاتو له بریا وروسته، د اورکزۍ د پولیسو مشر شوکت علي څرګنده او سخته څرګندونه وکړه، هغه وویل:
“د اورکزۍ پولیسو پیغام روښانه دی — د فتنې الخوارج ترهګر به هېڅ ځای کې پناه وانخلي. د امن او ثبات د دښمنانو پر ضد به له اوسپنیزو لاسونو کار واخیستل شي. د سیمې امن ساتل زموږ تر ټولو مهم مسؤلیت دی.”
دا بریالی عملیات د اورکزۍ پولیسو دا ژمنتیا څرګندوي چې هغوی به د هرې ممکنې هڅې په مټ د سیمې امن او ثبات ته دوام ورکړي.
