د پاکستان د ولسمشر آصف علي زرداري او د قطر د امیر شیخ تمیم بن حمد الثاني تر منځ په دوحه کې یوه مهمه او تاریخي ناسته ترسره شوه، چې پکې دواړو لوریو د خپلو ورورولیو او تاریخي اړیکو د لا پیاوړتیا پرېکړه وکړه.
د قطر امیر د پاکستان او د هغه د لاسته راوړنو ستاینه وکړه او د قطر د پرمختګ په بهیر کې د پاکستاني ټولنې مثبت رول یې وستایه. هغه هیله څرګنده کړه چې په راتلونکي کې به په قطر کې د پاکستاني کارکوونکو شمېر نور هم زیات شي.
ولسمشر آصف علي زرداري د پاکستان د حکومت او ولس له لوري د نیکو هیلو پیغام د قطر امیر ته ورساوه او د قطر د چټک پرمختګ او د امیر د لرلید لرونکې مشرتابه ستاینه یې وکړه.
په دې موقع د قطر امیر د پاکستان او سعودي عربستان د ګډ دفاعي تړون هرکلی وکړ او هغه یې پر خپل وخت او مهم اقدام وباله. هغه ومنله چې پاکستان د چین، لوېدیځو هېوادونو او خلیجي دولتونو سره په یو وخت اړیکې لري او دا ځانګړتیا یې بېسارې ده.
ولسمشر زرداري د دفاع، دفاعي تولیداتو، کرنې او خوړو د خوندیتوب په برخو کې د دوهاړخیزو همکاریو د پراخولو وړاندیز وکړ، چې امیرِ قطر یې سمدستي ملاتړ وکړ او اړوندو ادارو ته یې د اړیکو د پیاوړتیا امر ورکړ.
ولسمشر زرداري د افغانستان په اړه د دوحې د خبرو د کوربهتوب او د قطر مثبت رول وستایه. د قطر امیر هیله څرګنده کړه چې پاکستان او افغانستان به اوسني اختلافات حل کړي او شته ننګونې به تر شا پرېږدي.
د لیدنې یو مهم پای دا و چې د قطر امیر به د راتلونکي کال په پیل کې پاکستان ته رسمي سفر کوي، چې د ولسمشر زرداري بلنه یې منلې ده.
په دې لیدنه کې بلاول بهټو زرداري او د پاکستان سفیر هم حاضر وو.
