د پاکستان صدر آصف علي زرداري د ګلګت ـ بلتستان د اووه اويايمې کليزې د ازادۍ د نمانځنې په مناسبت جوړې شوې غونډې ته په وینا کې د سيمې د پرمختګ او خوشحالۍ لپاره د نوې ژمنې اعلان وکړ.
صدر زرداري وويل چې د چين ـ پاکستان اقتصادي دهلېز (سي پېک) د ګلګت ـ بلتستان خلکو ته د روزګار، سوداګرۍ او اړيکو نوي فرصتونه برابر کړي دي. د هغه په وينا، ګډ هدف دا دی چې دا فرصتونه د هرې درې او هر کلي تر کچې ورسېږي، څو د سيمې د هر اوسېدونکي لپاره ګډه خوشحالي رامنځته شي. نوموړي دا ژمنه هم تکرار کړه چې ګلګت ـ بلتستان به د پرمختګ، عدالت او مساوات يوه بېلګه سیمه جوړوي.
صدر زرداري د خپلې وینا په ترڅ کې د هند تر ولکې لاندې کشمیر د خلکو يادونه هم وکړه. هغه وويل، کله چې د ګلګت ـ بلتستان وګړي د ازادۍ او حقونو نه برخمن دي، زموږ کشمیري ورونه او خويندې لا هم تر اشغال لاندې ژوند کوي. هغه ټينګار وکړ چې پاکستان به د ملګرو ملتونو د پرېکړو او د کشمیري ولس د هیلو سره سم، د هغوی تر ازادۍ پورې د ملاتړ دريځ ته دوام ورکړي.
د پاکستان ولسمشر زياته کړه چې د ګلګت ـ بلتستان خلکو د تېرو اووه لسيزو په اوږدو کې د هېواد له ولس سره شانه په شانه سفر کړی دی. هغه دا سیمه د پاکستان تاج، د شمالي سرحدونو ساتونکې او له چين سره د تلپاتې دوستۍ نښه وبلله. زرداري زياته کړه چې د دې دوستۍ څرګنده بېلګه د قراقرم لويه لاره ده چې دواړه هېوادونه سره نښلوي.
نوموړي وويل، پاکستان پيپلز ګوند تل د ګلګت ـ بلتستان د خلکو د خدمت او پرمختګ هڅه کړې ده. د هغه په وينا، د ګوند لومړيتوب دا دی چې د سيمې په هره درې کې د زده کړې او روغتيا اسانتياوې برابرې شي او هر ماشوم ښوونځي ته د تلو فرصت ولري.
صدر زرداري د سيمې د اقتصادي او طبيعي توان ستاينه هم وکړه او ويې ويل چې ګلګت ـ بلتستان د اوبو او برېښنا د توليد پراخ ظرفيت او د ګرځندوی (سياحت) بېپايه امکانات لري، چې د پاکستان د راتلونکي اقتصادي پرمختګ لپاره مهم رول لوبولی شي.
په پای کې هغه دعا وکړه چې د ګلګت ـ بلتستان خلک دې د يو پرمختللي، متحد او خوشحاله پاکستان په جوړولو کې خپل پوره رول ادا کړي.
