د فدرالي اطلاعاتو او خپرونو وزیر عطاالله تارڑ او د کورنیو چارو وزیر مملکت طلال چوهري د شنبې په ورځ په ګډه خبري غونډه کې څرګنده کړه چې هند د ‘آپریشن سندور’ په ناکامۍ پسې د پاکستان پر ضد د دروغو پروپیګنډې نوی لړۍ پیل کړې ده.
وزیرانو د اعجاز ملاح په نوم یو کس اعترافي ویډیو خپره کړه، چې پکې یې څرګنده کړه چې هغه د هندي ایجنټ ‘اشوک’ لپاره د پاکستاني پوځ یونیفورم، کرنسي او نور توکي برابرول، ترڅو هند یې د پاکستان پر ضد د جعلي ثبوتونو او دروغو بیانیې د جوړولو لپاره وکاروي.
عطاالله تارړ څرګنده کړه چې د دې عملیاتو هدف کېدای شي د هندي بحري ځواکونو تمرینات، یا په هند کې دننه فشارونه او انتخابات وي، ترڅو خلکو پام بله خوا ته واوړي.
طلال چوهري وویل چې د کلبوشن یادیو وروسته اوس هند بیا هڅه کوي د پاکستاني کب نیونکو په کارولو سره ځینې عملیات ترسره کړي. هغه تایید کړه چې د اعجاز ملاح ویډیو او آډیو نوټونه د هندي پلان بشپړ بې نقابه کړی دی.
وزیرانو ټینګار وکړ چې پاکستاني ادارې خبردار دي او دښمنې هرې کړنې ته مؤثر ځواب ورکولو توان لري.
وزیرانو پر هند د ‘فیک انکاؤنټرونو’ او ‘سټیج شویو پېښو’ تور ولګاوه او څرګنده کړه چې پاکستان به د خپلې ملي امنیت سره هېڅ ډول معامله ونه کړي او خپله خاوره به د چا پر ضد استعمال نه کړي.
په همدې غونډه کې د اعجاز ملاح او د هغه هندي هینډلر ترمنځ آډیو خبرې هم خپرې شوې، چې پکې اعجاز ملاح ته په ځانګړي ډول د زونګ سم راوړلو لارښوونه شوې وه، ترڅو چین د مداخلې تاثر ورکړل شي.
