افغانستان کے صوبے کنڑ اور ننگرہار میں اتوار کی رات مقامی وقت کے مطابق 12 بجے آنے والے زلزلوں سے اب تک 622 افراد جاں بحق اور 1,555 زخمی ہو چکے ہیں، جبکہ ایک بڑی تعداد میں مکانات بھی تباہ ہو گئے ہیں۔

وزارت داخلہ کے ترجمان عبدالمتین قانی نے پریس کانفرنس میں بتایا کہ کنڑ میں 610 افراد جاں بحق اور 1,300 زخمی ہوئے ہیں، جبکہ ننگرہار میں 12 اموات اور 255 زخمیوں کی اطلاع ہے۔

عبدالمتین قانی نے مزید کہا کہ وزیر داخلہ خلیفہ سراج الدین حقانی نے مقامی حکام کو متاثرہ خاندانوں کو فوری امداد فراہم کرنے کی ہدایت دی ہے۔

امریکی ارتھ آئیڈنٹیفیکیشن سینٹر کے مطابق زلزلے کی شدت 6.2  تھی اور زلزلے کا مرکز ننگرہار کے ضلع مہمند درہ کے گاؤں باسل سے 36 کلومیٹر شمال میں تھا۔