خیبر پختونخوا کے وزیراعلیٰ علی امین گنڈا پور نے شمالی و جنوبی وزیرستان سمیت ضم شدہ اضلاع میں امن و امان کی صورتحال کا جائزہ لینے کے لیے ایک اعلیٰ سطحی اجلاس کی صدارت کی ہے۔ اجلاس میں متعلقہ صوبائی وزراء اور اعلیٰ سرکاری حکام نے شرکت کی ہے۔
وزیر اعلی ہاوس سے جاری بیان کے مطابق اجلاس کے دوران دہشت گردی کے خاتمے کے لیے تمام مکاتب فکر اور عوام کی مشترکہ اور متفقہ حکمت عملی وضع کرنے کا فیصلہ کیا گیا۔ وزیراعلیٰ علی امین گنڈا پور نے کہا کہ وقت کا تقاضا ہے کہ سیاست سے بالاتر ہوکر تمام سیاسی جماعتیں ایک پلیٹ فارم سے امن و امان کے قیام کے لیے مشترکہ لائحہ عمل اپنائیں۔ انہوں نے مزید کہا کہ عوامی نمائندے یک زبان ہوکر دہشت گردی کے خاتمے کی حکمت عملی کا اطلاق یقینی بنائیں۔
اس اجلاس میں دہشت گردی کے خلاف مشترکہ لائحہ عمل کی تشکیل کے لیے ایک حکومتی وفد کی تشکیل کا بھی فیصلہ کیا گیا۔ یہ وفد تمام علاقوں کا دورہ کرکے عوامی مشاورت کے سلسلے کو مزید تیز کرے گا۔ اس کے علاوہ، اس سلسلے میں آل پارٹیز کانفرنس بلانے کا بھی فیصلہ کیا گیا ہے جس کے لیے تمام سیاسی جماعتوں کے پارلیمانی لیڈروں کو دعوت نامے ارسال کیے جائیں گے۔
وزیراعلیٰ علی امین گنڈا پور نے ضم شدہ اضلاع سے تعلق رکھنے والے قومی اسمبلی اور صوبائی اسمبلی کے ارکان کا بھی ہنگامی اجلاس طلب کر لیا ہے۔ وزیراعلیٰ نے زور دیا کہ بامعنی اقدامات، باہمی مشاورت اور متفقہ فیصلوں کے ذریعے ہی دائمی امن قائم ہو سکتا ہے۔
