خیبر پختونخوا کے ضلع کوہاٹ کے تھانہ لاچی کی حدود میں پولیس نے دہشت گردوں کے خلاف ایک کامیاب کارروائی کرتے ہوئے تین دہشت گردوں کو ہلاک کر دیا۔ یہ کارروائی دہشت گردوں کے پولیس پر دہشت گردوں کی بزدلانہ حملے کے بعد کی گئی، جس میں ایک پروبیشنر اسسٹنٹ سب انسپکٹر اشفاق شہید اور دو کانسٹیبل زخمی ہو گئے تھے۔
واقعہ کی اطلاع ملتے ہی ریجنل پولیس آفیسر (آر پی او) عباس مجید مروت اور ڈسٹرکٹ پولیس آفیسر ڈاکٹر زاہد اللہ بھاری نفری کے ہمراہ فوری طور پر جائے وقوعہ پر پہنچے اور آپریشن کی کمان سنبھالی۔ پولیس نے علاقے کو گھیرے میں لے کر سرچ آپریشن شروع کیا۔ پولیس ذرائع کے مطابق سنگلاخ پہاڑوں اور گھنے جنگل میں کیے گئے اس کامیاب آپریشن کے نتیجے میں تین دہشت گردوں کو ہلاک کر دیا گیا، جن کی لاشیں برآمد کر لی گئی ہیں۔ ہلاک ہونے والے دہشت گردوں کی شناخت کا عمل جاری ہے۔
اس موقع پر آر پی او عباس مجید مروت نے کہا کہ ہمارے بہادر جوانوں نے دہشت گردوں کا مقابلہ کیا اور انہیں ان کے انجام تک پہنچایا۔ انہوں نے مزید کہا کہ ہم اپنے شہداء کی قربانیوں کو رائیگاں نہیں جانے دیں گے اور دہشت گردی کے خلاف ہماری جنگ جاری رہے گی۔ زخمی ہونے والے دیگر دہشت گردوں کی تلاش میں بھی آپریشن جاری ہے۔
