پاک فوج کے شعبہ تعلقات عامہ (آئی ایس پی آر) کے مطابق، 29 اور 30 اکتوبر 2025 کی درمیانی شب باجوڑ ضلع میں سیکیورٹی فورسز نے پاک-افغان سرحد کے ذریعے دراندازی کی کوشش کرنے والے خوارج (دہشت گردوں) کے ایک گروہ کی نقل و حرکت کا پتا چلایا۔

پاک فوج کے مطابق ہمارے جوانوں نے مؤثر کارروائی کرتے ہوئے خوارج کی دراندازی کی کوشش کو ناکام بنا دیا۔ درست اور مہارت سے کی گئی اس کارروائی کے نتیجے میں، ‘فتنہ الخوارج’ کے ایک اعلیٰ قدر کے مطلوب کمانڈر، خارِجی امجد عرف مزاحم سمیت چار خوارج کو جہنم واصل کر دیا گیا۔

آئی ایس پی آر نے بتایا کہ ہلاک ہونے والا خارِجی کمانڈر امجد عرف مزاحم جو کہ خارِجی نور ولی کا نائب اور بھارتی ایجنٹ ‘فتنہ الخوارج’ کی رہبری شوریٰ کا سربراہ تھا، قانون نافذ کرنے والے اداروں کو انتہائی مطلوب تھا۔ ترجمان کے مطابق حکومت نے اس کے سر کی قیمت 50 لاکھ روپے مقرر کر رکھی تھی۔ یہ کمانڈر افغانستان میں مقیم رہتے ہوئے پاکستان کے اندر متعدد دہشت گردانہ سرگرمیوں میں فعال طور پر ملوث رہا تھا۔

پاک فوج نے مزید بتایا کہ یہ امر قابل ذکر ہے کہ ‘فتنہ الخوارج’ کی قیادت افغانستان میں رہائش پذیر ہے اور پاکستان میں دراندازی کی کوششوں کی منصوبہ بندی کر رہی ہے، جس کا بنیادی مقصد ملک میں اپنی موجودگی کا تاثر دینا اور سیکیورٹی فورسز کے مؤثر آپریشنز کی وجہ سے باجوڑ اور مہمند میں اپنے خوارج کے گرتے ہوئے حوصلے کو بڑھانا ہے۔

آئی ایس پی آر نے اس بات کا اعادہ کیا کہ افغان عبوری حکومت کو ٹھوس اقدامات کرنے چاہئیں تاکہ افغان سرزمین کو خارِجی ایجنٹوں کی طرف سے پاکستان کے خلاف دہشت گردی کے لیے استعمال نہ کیا جا سکے۔ ترجمان نے بتایا کہ یہ واقعہ ایک بار پھر ہمارے مؤقف کی توثیق کرتا ہے کہ افغان سرزمین کو ‘فتنہ الخوارج’ سے تعلق رکھنے والے خوارج کے لیے پاکستان کے خلاف محفوظ پناہ گاہ کے طور پر مسلسل استعمال کیا جا رہا ہے۔

پاک فوج نے اپنے پیغام میں واضح کیا کہ پاکستان کی سیکیورٹی فورسز ملک کی سرحدوں کے دفاع کے اپنے عزم پر پختہ اور اٹل ہیں۔

آئی ایس پی آر نے مزید کہا کہ علاقے میں موجود کسی بھی دوسرے بھارتی ایجنٹ خارِجی کو ختم کرنے کے لیے سینیٹائزیشن آپریشن جاری ہے۔ وفاقی ایپکس کمیٹی برائے قومی ایکشن پلان سے منظور شدہ "عزمِ استحکام” کے وژن کے تحت سیکیورٹی فورسز اور قانون نافذ کرنے والے اداروں کی جانب سے غیر ملکی سرپرستی اور حمایت یافتہ دہشت گردی کے ناسور کو ملک سے مکمل طور پر جڑ سے اکھاڑ پھینکنے کے لیے یہ نہ رکنے والی انسداد دہشت گردی مہم پوری رفتار سے جاری رہے گی۔