بلوچستان کے ضلع خضدار کے علاقے زہری میں سیکیورٹی فورسز نے خفیہ اطلاعات کی بنیاد پر تخریبی تنظیم ‘فتنہ الہندوستان’ کے خلاف ایک وسیع آپریشن کا آغاز کر دیا ہے۔
سیکیورٹی ذرائع کے مطابق زہری کے ملحقہ پہاڑوں میں دہشت گردوں کی موجودگی اور نقل و حرکت کی مصدقہ اطلاعات تھیں، جو مقامی آبادی کو مسلسل ہراساں بھی کر رہے تھے۔ بڑھتی ہوئی دہشت گردانہ سرگرمیوں کے پیش نظر، فورسز نے فوری کارروائی کا فیصلہ کیا ہے۔
سیکیورٹی زرائع نے بتایا کہ آپریشن کے نتیجے میں اب تک فتنہ الہندوستان کے 7 دہشت گرد مارے جا چکے ہیں، جبکہ 10 کے زخمی ہونے کی بھی اطلاعات ہیں۔
زرائع کے مطابق اس آپریشن میں بڑی تعداد میں گراؤنڈ فورسز کے ساتھ ساتھ ہیلی کاپٹرز کا بھی استعمال کیا جا رہا ہے۔
ہلاک ہونے والے دہشت گردوں کے قبضے سے تیار شدہ آئی ای ڈیز، ٹرانسمیٹرز، امریکی ساختہ خودکار ہتھیار، گرینیڈ، گولیاں، اور موٹر سائیکلیں برآمد ہوئی ہیں۔
سیکیورٹی فورسز نے بدوکشت کے مرکزی پُل پر نصب کی گئی ایک بڑی آئی ای ڈی کو بھی بروقت کارروائی کرتے ہوئے کامیابی سے ناکارہ بنا دیا۔
سیکیورٹی ذرائع نے اس عزم کا اظہار کیا ہے کہ وہ زہری اور پورے بلوچستان میں انڈیا کی ایماء پر تخریبی کارروائیوں میں ملوث فتنہ الہندوستان کے مکمل خاتمے تک یہ آپریشن جاری رکھیں گے۔
