سعودی عرب میں عمرہ ادا کرنے کے بعد سفر کے دوران ایک افسوسناک ٹریفک حادثے میں خیبر پختونخوا کے ضلع بونیر سے تعلق رکھنے والے 7 پاکستانی شہید ہو گئے ہیں اور 6 دیگر زخمی ہوئے ہیں۔

مقامی ذرائع کے مطابق بونیر کے ڈاگئی توتلی نامی علاقے سے تعلق رکھنے والے 13 افراد کا قافلہ عمرہ کی سعادت حاصل کرنے کے بعد عرفات سے مدینہ منورہ جا رہا تھا کہ راستے میں ان کی گاڑی کو حادثہ پیش آیا ہے۔

تمام متاثرہ افراد کا تعلق عمر باچا کی فیملی سے ہے۔ شہداء میں مرد، خواتین اور بچے شامل ہیں۔ کہا جا رہا ہے کہ وہ سب آپس میں رشتے دار ہیں۔
اس حادثے کی خبر آگ کی طرح پھیلی، جس کے بعد بونیر کی ڈاگئی توتلی کے علاقے میں شدید غم کا سماں ہے۔ علاقے میں فضا سوگوار ہے اور تعزیت کا سلسلہ جاری ہے۔

اہل خانہ کے مطابق شہداء کی نماز جنازہ آج رات سعودی عرب میں ادا کی جائے گی اور زخمیوں کو سعودی ہسپتالوں میں طبی امداد دی جا رہی ہے۔