پاکستان کے نائب وزیراعظم و وزیر خارجہ سینیٹر محمد اسحاق ڈار نے منگل نیویارک میں اقوام متحدہ کے ہیڈکوارٹرز میں منعقدہ دولت مشترکہ کے وزرائے خارجہ کے اجلاس میں شرکت کی۔ یہ اجلاس اقوام متحدہ کی 80ویں جنرل اسمبلی کے اجلاس کے موقع پر منعقد کیا گیا تھا۔

دفتر خارجہ کی جانب سے جاری کردہ بیان کے مطابق نائب وزیراعظم و وزیر خارجہ نے دولت مشترکہ کے لیے پاکستان کی غیر متزلزل حمایت اور اس منفرد ممالک کے خاندان کو مضبوط بنانے کے عزم کا اعادہ کیا۔ انہوں نے عالمی تناظر میں تنظیم کو مزید مؤثر بنانے کی کوششوں کا خیرمقدم کیا تاکہ یہ اپنے تمام رکن ممالک کو ٹھوس فوائد فراہم کر سکے۔

دفتر خارجہ کے مطابق عالمی برادری کو درپیش متعدد اور باہم مربوط بحرانوں کا ذکر کرتے ہوئے اسحاق ڈار نے اس بات پر زور دیا کہ دولت مشترکہ کو امن سازی اور مکالمے کے پلیٹ فارم کے طور پر اپنا کردار جاری رکھنا چاہیے، جہاں اتفاق رائے اور تعاون کے ذریعے تنازعات کو حل کرنے اور مفاہمت کو فروغ دینے میں مدد مل سکے۔ انہوں نے ماحولیاتی تبدیلیوں پر دولت مشترکہ کے کام کی بھرپور حمایت کی اور رکن ممالک کو ماحولیاتی لچک پیدا کرنے میں مدد پر مستقل توجہ دینے کا مطالبہ کیا۔

نائب وزیراعظم نے نوجوانوں کو بااختیار بنانے، ڈیجیٹل تبدیلی اور تجارت و کاروباری سرگرمیوں کو فروغ دینے کے لیے 56 مختلف اراکین کو اکٹھا کرنے میں دولت مشترکہ کے انوکھے کردار کو سراہا۔ انہوں نے کہا کہ پاکستان کو دولت مشترکہ کے نوجوانوں کے ایجنڈے میں قائدانہ کردار ادا کرنے پر فخر ہے تاکہ ہماری نوجوان نسل ایک زیادہ خوشحال اور پرامن مستقبل تشکیل دے سکے۔ وزیر خارجہ نے مزید کہا کہ پاکستان دولت مشترکہ کے کنیکٹیوٹی ایجنڈے کو آگے بڑھانے میں بھی پیش پیش رہے گا اور ایسی کوششوں کی حمایت کرے گا جو دولت مشترکہ میں ڈیجیٹل، فزیکل، ریگولیٹری اور سپلائی چین کے روابط کو مضبوط بنائیں۔