خیبر پختونخوا کے ضلع بنوں میں گزشتہ شب تھانہ ہوید کی حدود میں واقع دو پولیس چوکیوں، شیخ لنڈک اور مزانگہ پر دہشتگردوں نے جدید ہتھیاروں سے حملہ کیا ہے۔ تاہم، پولیس کی بروقت اور مؤثر جوابی کارروائی کے نتیجے میں دونوں حملے ناکام بنا دیے گئے۔
تفصیلات کے مطابق چوکی شیخ لنڈک پر ڈرون جبکہ چوکی مزانگہ پر دہشتگردوں نے چھوٹے بڑے ہتھیاروں سے حملہ کیا ہے۔ حملے میں پولیس کی تھرمل کیمرہ ٹیکنالوجی کو نشانہ بنانے کی کوشش کی گئی۔ تاہم پولیس اہلکاروں نے اپنی پیشہ ورانہ مہارت، دلیری اور ہوشیاری کا مظاہرہ کرتے ہوئے فوری اور مؤثر جوابی کارروائی کی ہے۔ اس بھرپور جوابی کارروائی کے نتیجے میں دہشت گرد فرار ہونے پر مجبور ہو گئے جبکہ چوکی کی عمارت، پولیس تنصیبات اور نفری مکمل طور پر محفوظ رہے۔
انسپکٹر جنرل آف پولیس خیبرپختونخوا ذوالفقار حمید اور ریجنل پولیس آفیسر بنوں سجاد خان نے بنوں پولیس کی اس جرات مندانہ کارروائی کو سراہا ہے۔ انہوں نے تمام جوانوں کو شاباش دی اور انعامات کا اعلان کرتے ہوئے کہا کہ یہ بزدلانہ کارروائیاں ہمارے حوصلے پست نہیں کر سکتیں۔ انہوں نے مزید کہا کہ خیبرپختونخوا پولیس ہر محاذ پر چوکنا، مستعد اور مکمل طور پر تیار ہے، اور آئندہ بھی ایسے تمام حملوں کا بھرپور اور جرات مندانہ انداز میں جواب دیا جائے گا۔ آئی جی پی نے زور دیا کہ پولیس فورس دہشت گردی کے خلاف جنگ میں فرنٹ لائن پر ہے اور عوام کے تحفظ کے لیے ہر ممکن قدم اٹھایا جائے گا۔
پولیس کی جانب سے علاقے میں سرچ اینڈ کلیئرنس آپریشن شروع کر دیا گیا ہے تاکہ فرار ہونے والے عناصر کو قانون کے کٹہرے میں لایا جا سکے۔
