وزیراعظم محمد شہباز شریف نے اتوار کے روز ملک بھر میں سات روزہ انسداد پولیو مہم کاافتتاح کر دیا۔

اس مہم کا مقصد گلگت بلتستان اور آزاد کشمیر سمیت ملک بھر میں پانچ سال سے کم عمر لاکھوں بچوں کو پولیو سے بچاؤ کے قطرے پلانا ہے۔ یہ مہم 27 اپریل کو اختتام پذیر ہوگی۔

وزیراعظم نے مہم کی افتتاحی تقریب میں خود بچوں کو پولیو کے قطرے پلائے۔ انہوں نے وزارت صحت کی انتھک کوششوں کو اجاگر کیا، خاص طور پر وزیر مصطفیٰ کمال اور ڈاکٹر ملک مختار احمد بھرتھ کے ساتھ ساتھ سیکرٹری، کوآرڈینیٹر اور فرنٹ لائن ہیلتھ ورکرز کا ذکر کیا۔ انہوں نے تمام والدین پر زور دیا کہ وہ ویکسینیشن ٹیموں کے ساتھ مکمل تعاون کریں۔

کچھ علاقوں میں بچوں تک رسائی حاصل کرنے میں درپیش چیلنجوں کو تسلیم کرتے ہوئے وزیراعظم نے کہا کہ ویکسینیشن ٹیموں کی حفاظت اور مہم کے یکساں نفاذ کو یقینی بنانے کے لیے مضبوط اقدامات کیے گئے ہیں انہوں نے کمیونٹی کو متحرک کرنے کی ضرورت پر زور دیا۔

وزیراعظم نے عالمی شراکت داروں، بشمول عالمی ادارہ صحت (ڈبلیو ایچ او) اور بل گیٹس کی مسلسل حمایت پر ان کا شکریہ ادا کیا اور اجتماعی عزم اور تعاون کے ذریعے پولیو کے مستقل خاتمے کے حصول پر اعتماد کا اظہار کیا۔ وفاقی وزیر صحت مصطفیٰ کمال، ڈاکٹر ملک مختار احمد بھرتھ اور دیگر سینئر صحت حکام نے لانچ ایونٹ میں شرکت کی۔

ملک میں 2025 میں پہلے ہی وائرس کے چھ کیس رپورٹ ہو چکے ہیں۔ وزیر صحت نے ایک ٹی وی پروگرام کو بتایا کہ پچھلی مہم میں 44,000 خاندانوں نے ویکسینیشن سے انکار کیا تھا جن میں سے 34,000 صرف کراچی میں تھے۔