نائب وزیر اعظم اور وزیر خارجہ سینیٹر محمد اسحاق ڈار نے افغانستان سے سرحد پار دہشت گردی کے خلاف بین الاقوامی حمایت پر زور دیا ہے۔ انہوں نے اس بات کا اظہار نیویارک میں اقوام متحدہ کے سیکرٹری جنرل انتونیو گوٹریس سے ملاقات میں کیا۔ 

 ڈار نے پاکستان کی کثیرالجہتی اور اقوام متحدہ کے چارٹر کے ساتھ وابستگی کی عزم کا اعادہ کیا۔ انہوں نے پاکستان کی اقوام متحدہ کی سلامتی کونسل میں غیر مستقل رکن (2025-2026) کے طور پر ادا ہونے والے کردار پر بھی روشنی ڈالی۔ 

انہوں نے امن، سلامتی، ترقی اور موسمیاتی تبدیلی جیسے عالمی چیلنجوں سے نمٹنے میں اقوام متحدہ کے کردار کے لیے پاکستان کی مضبوط حمایت پر زور دیا اور خاص طور پر افغانستان کی صورت حال کی جانب توجہ دلائی۔ انہوں نے افغانستان کی سرزمین سے ہونے والی دہشت گردی کے خلاف اقوام متحدہ سے  حمایت کی اپیل کی اور افغان عوام کو فراہم کی جانے والی اہم انسانی امداد پر زور دیا۔ 

وزیر خارجہ نے یہ تجویز پیش کی کہ وسطی ایشیا اور پاکستان کے درمیان افغانستان کے ذریعے رابطے کے منصوبے  بنائے جائیں تاکہ خطے میں معاشی ترقی کو فروغ دیا جا سکے۔ 

ڈار نے اس موقع پر کشمیر کے مسئلے کے منصفانہ حل کی سفارش کی جو اقوام متحدہ کی سلامتی کونسل کی قراردادوں کے مطابق ہو۔  انہوں نے اس موقع پر فلسطین کے معاملے میں 1967 کی سرحدوں کے ساتھ القدس کو دارالحکومت بنانے پر مبنی دو ریاستی حل کے لیے پاکستان کی غیر متزلزل حمایت کا اعادہ کیا۔ انہوں نے فلسطینیوں کے خلاف اسرائیلی جارحیت کی مذمت  بھی کی۔

ملاقات میں آنے والی "سمٹ آف دی فیوچر” کا بھی تذکرہ کیا گیا جس میں ڈار نے امید ظاہر کی کہ "پیکٹ فار دی فیوچر” کو مکمل طور پر نافذ کیا جائے گا تاکہ ترقی پذیر ممالک کے سسٹینیبل دویلپمنٹ گولز اور موسمیاتی اہداف کو حاصل کرنے کے لیے مالی ضروریات کو پورا کیا جا سکے۔ 

سیکرٹری جنرل گوٹریس نے پاکستان کی اقوام متحدہ کے معاملات میں سرگرم شرکت اور امن کے لیے اپنی کوششوں کے ذریعے بین الاقوامی امن و سلامتی میں شراکت کے لیے شکریہ ادا کیا۔ ڈار کا یہ دورہ نیویارک میں چین کی طرف سے بلائی گئی اقوام متحدہ کی سلامتی کونسل کے ایک اعلی سطحی اجلاس "پریکٹسنگ ملٹی لیٹرلزم: ریفارمنگ اینڈ امپروونگ گلوبل گورننس” میں شرکت کی غرض سے ہو رہا ہے۔