گزشتہ رات خیبرپختونخوا کے ضلع بنوں میں فتنہء خوارج کے دہشتگردوں کی جانب سے تھانہ ہوید کی حدود چوکی مزانگہ پر حملے کی بزدلانہ اور ناکام کوشش کی گئی۔ چوکی میں موجود پولیس کے بہادر جوانوں نے بروقت اور مستعدانہ کارروائی کرتے ہوئے دشمن کے ناپاک عزائم کو ناکام بنا دیا۔
تفصیلات کے مطابق گزشتہ رات تین دہشتگرد بارودی مواد سے بھری زرنج رکشہ کے ذریعے چوکی مزانگہ پر حملہ کرنے کی کوشش کر رہے تھے کہ چوکی میں موجود پولیس جوانوں نے مشکوک نقل و حرکت دیکھ کر رکشہ کو روکنے کی کوشش کی۔ نہ رکنے پر پولیس جوانوں نے فوری فائرنگ کی جس سے رکشہ وہیں زوردار دھماکے سے پھٹ گیا۔
دھماکے کے نتیجے میں تینوں دہشتگرد موقع پر ہی ہلاک ہوگئے جبکہ پولیس اہلکار محفوظ رہے۔ تاہم، دھماکے کی شدت سے قریب واقع گھروں کو معمولی نقصان پہنچا۔
ڈی آئی جی بنوں ریجن سجاد خان اور ڈی پی او بنوں سلیم عباس کلاچی نے پولیس اہلکاروں کی بروقت اور دلیرانہ کارروائی کو سراہا۔ انہوں نے کہا کہ چوکی مزانگہ کے جوانوں نے فرض شناسی، بہادری اور پیشہ ورانہ مہارت کی بہترین مثال قائم کی ہے۔ انہوں نے مزید کہا کہ ایسے سپاہی بنوں پولیس کا فخر ہیں اور ریاست دشمنوں کی ہر بزدلانہ کوشش ناکام بنائی جاتی رہے گی۔ انہوں نے اس عزم کا اعادہ کیا کہ بنوں پولیس ہر قیمت پر عوام کے جان و مال کے تحفظ کے لیے پرعزم ہے اور فتنہء الخوارج جیسے عناصر قوم اور عوام کے دشمن ہیں۔
ڈی آئی جی بنوں اور ڈی پی او نے چوکی میں موجود بہادر جوانوں کو نقد انعامات اور تعریفی اسناد دینے کا اعلان بھی کیا۔
عوام سے اپیل کی گئی ہے کہ وہ اپنے اردگرد کے حالات پر نظر رکھیں اور کسی بھی مشکوک شخص یا سرگرمی کی فوری اطلاع قریبی تھانے یا پولیس کنٹرول روم کو دیں۔ بنوں پولیس کا کہنا ہے کہ "پاکستان ہمارا ملک، ہمارا گھر ہے — پولیس اور عوام مل کر ہی دہشتگردی جیسے فتنوں کا مکمل خاتمہ کرسکتے ہیں” اور بنوں پولیس عوام کے تعاؤن سے امن و امان کے قیام کے لیے دن رات کوشاں ہے۔
