وزیر اعلیٰ بلوچستان میر سرفراز بگٹی کی زیر صدارت کوئٹہ میں افغان مہاجرین کے انخلاء کی وفاقی پالیسی پر عملدرآمد اور ضلع قلعہ عبداللہ کی امن و امان کی صورتحال کا جائزہ لینے کے لیے ایک اہم اجلاس منعقد ہوا۔
اجلاس میں ایڈیشنل چیف سیکرٹری داخلہ حمزہ شفقات نے انخلاء کے عمل اور سکیورٹی صورتحال کے حوالے سے تفصیلی بریفنگ دی اور بتایا کہ صوبہ بھرپور طریقے سے وفاقی پالیسی پر عملدرآمد کر رہا ہے اور اس سلسلے میں اقوام متحدہ کے ادارہ برائے افغان مہاجرین کے ساتھ مسلسل رابطہ قائم ہے۔
وزیر اعلی ہاوس سے جاری بیان کے مطابق وزیر اعلیٰ میر سرفراز بگٹی نے انخلاء کے دوران انسانی حقوق اور وقار کو یقینی بنانے پر خصوصی زور دیا۔ انہوں نے واضح ہدایت کی کہ خواتین، بزرگوں اور بچوں کا خصوصی خیال رکھا جائے اور کسی بھی مرحلے پر تحقیر آمیز رویہ ہرگز برداشت نہیں ہوگا۔ انہوں نے متعلقہ حکام کو مکمل تعاون اور معاونت فراہم کرنے کا حکم دیا اور کہا کہ تمام افراد کی عزتِ نفس کا خیال رکھنا حکومت کی اولین ترجیح اور ذمہ داری ہے۔ وزیر اعلیٰ نے متنبہ کیا کہ تضحیک آمیز رویوں کی شکایات پر ملوث اہلکاروں کے خلاف فوری کارروائی کی جائے گی۔
انخلاء کے عمل میں خواتین کی معاونت اور سہولت کے لیے عارضی بنیادوں پر فیمیل سیکورٹی اہلکاروں کی بھرتی کا حکم بھی جاری کیا گیا۔
اجلاس میں قلعہ عبداللہ میں امن و امان کی صورتحال پر بھی غور کیا گیا۔ وزیر اعلیٰ نے قلعہ عبداللہ سے جرائم پیشہ عناصر کا ہر صورت خاتمہ یقینی بنانے کا سخت حکم دیا۔ انہوں نے ہدایت کی کہ لیویز اور پولیس ایریاز کی تقسیم سے قطع نظر بلاامتیاز کارروائی کی جائے اور جرائم پیشہ عناصر کو کسی قسم کی رعایت نہ دی جائے۔
وزیر اعلیٰ میر سرفراز بگٹی نے کہا کہ امن و امان کی بحالی کے لیے صوبائی حکومت اپنے تمام وسائل بروئے کار لائے گی۔ انہوں نے قلعہ عبداللہ کے ڈویژنل اور ضلعی انتظامی افسران کو بحالی امن کا خصوصی ٹاسک سونپا اور ہدایت کی کہ خصوصی اقدامات پر مبنی رپورٹ روزانہ کی بنیاد پر وزیر اعلیٰ سیکرٹریٹ میں پیش کی جائے۔
اجلاس میں چیف سیکرٹری بلوچستان شکیل قادر خان، ایڈیشنل چیف سیکرٹری داخلہ حمزہ شفقات، پرنسپل سیکرٹری بابر خان، آئی جی پولیس محمد طاہر، ڈی جی لیویز عبدالغفار مگسی، اور کمشنر کوئٹہ ڈویژن شاہ زیب کاکڑ نے شرکت کی۔ ڈی آئی جی ژوب، ڈپٹی کمشنر، ڈی پی او قلعہ عبداللہ اور چمن نے ویڈیو لنک کے ذریعے شرکت کی ہے۔
