پاک فوج کے شعبہ تعلقات عامہ (آئی ایس پی آر) نے جمعرات کو جاری کردہ بیان میں بتایا ہے کہ سیکیورٹی فورسز نے بلوچستان کے ضلع خضدار میں ایک کامیاب انٹیلی جنس بیسڈ آپریشن کیا ہے، جس کے دوران چار دہشت گردوں کو ہلاک کر دیا گیا۔
آئی ایس پی آر کے مطابق یہ کارروائی 17 ستمبر 2025 کو ہندوستانی پراکسی، فتنہ الہندستان سے تعلق رکھنے والے دہشت گردوں کی موجودگی کی خفیہ اطلاع پر کی گئی۔
آپریشن کے دوران، سیکیورٹی فورسز نے دہشت گردوں کے ٹھکانے کو گھیرے میں لیا اور شدید فائرنگ کا تبادلہ ہوا ہے۔ انہوں نے بتایا کہ فورسز نے مؤثر طریقے سے دہشت گردوں کا مقابلہ کیا اور بھارت کی سرپرستی یافتہ چار دہشت گردوں کو کیفر کردار تک پہنچایا۔ بیان میں مزید کہا گیا ہے کہ ہلاک ہونے والے دہشت گرد علاقے میں متعدد دہشت گردانہ سرگرمیوں میں ملوث تھے۔ ہلاک ہونے والے دہشت گردوں کے قبضے سے ہتھیار، گولہ بارود اور بڑی مقدار میں دھماکہ خیز مواد بھی برآمد کیا گیا ہے۔
آئی ایس پی آر کا کہنا ہے کہ علاقے کو مکمل طور پر محفوظ بنانے اور کسی بھی دوسرے دہشت گرد کے خاتمے کے لیے سینیٹائزیشن (کلیرنس) آپریشن جاری ہے۔ سیکیورٹی فورسز نے ملک سے بھارت کی سرپرستی میں ہونے والی دہشت گردی کے خطرے کو جڑ سے اکھاڑ پھینکنے کے عزم کا اعادہ کیا ہے اور قوم کے اس غیر متزلزل عزم کی توثیق کی ہے کہ دہشت گردی کے مرتکب افراد کو انصاف کے کٹہرے میں لایا جائے گا۔
