بلوچستان کے ضلع اوستہ محمد میں پولیس وین پر دستی بم حملے میں 4 پولیس اہلکاروں سمیت 6 افراد زخمی ہوگئے ہیں۔ اطلاعات کے مطابق یہ واقعہ تھانہ سٹی کی حدود میں پیش آیا۔
پولیس کے مطابق، نامعلوم موٹرسائیکل سواروں نے ریلوے پھاٹک کے قریب کھڑی پولیس موبائل پر دستی بم پھینکا۔ حملے کے نتیجے میں پولیس اہلکار عبدالنبی، قادر بخش، عبداللہ، بہرام اور دو راہگیر زخمی ہوگئے۔
تمام زخمیوں کو فوری طور پر اسپتال منتقل کردیا گیا، جہاں انہیں طبی امداد دی جا رہی ہے۔ واقعے کے بعد پولیس نے علاقے کی ناکہ بندی کرکے ملزمان کی تلاش شروع کردی ہے۔ پولیس کا کہنا ہے کہ اس حملے کی مزید تحقیقات جاری ہیں۔
