پاک فوج کے شعبہ تعلقات عامہ (آئی ایس پی آر) کے مطابق 13 سے 15 اکتوبر 2025 کے دوران صوبہ خیبر پختونخوا کے مختلف علاقوں میں سیکیورٹی فورسز سے جھڑپوں میں انڈین حمایت یافتہ ‘فتنہ الخوارج’ سے تعلق رکھنے والے 34 دہشت گرد ہلاک ہو گئے۔

آئی ایس پی آر کے مطابق خوارج کی موجودگی کی اطلاع پر سیکیورٹی فورسز نے ضلع شمالی وزیرستان کے علاقے سپین وام میں ایک انٹیلی جنس بیسڈ آپریشن کیا۔

بیان میں بتایا گیا کہ شدید فائرنگ کے تبادلے کے بعد سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا اور 18 خوارج مارے گئے۔

پاک فوج نے بتایا کہ ایک اور انٹیلی جنس بیسڈ آپریشن ضلع جنوبی وزیرستان میں کیا گیا جہاں فائرنگ کے تبادلے میں 8 دہشت گردوں کو کیفر کردار تک پہنچایا گیا۔

آئی ایس پی آر نے مزید بتایا کہ تیسری جھڑپ ضلع بنوں میں ہوئی جہاں سیکیورٹی فورسز نے کامیابی سے مزید 8 خوارج کو ہلاک کر دیا۔

بیان میں مزید کہا گیا ہے کہ علاقوں میں موجود دیگر انڈین حمایت یافتہ خوارج کو ختم کرنے کے لیے سینیٹائزیشن آپریشنز جاری ہیں۔ سیکیورٹی فورسز اور قانون نافذ کرنے والے ادارے وفاقی ایپکس کمیٹی برائے نیشنل ایکشن پلان سے منظور شدہ وژن "عزم استحکام” کے تحت انسداد دہشت گردی کی مہم مکمل رفتار سے جاری رکھیں گے تاکہ ملک سے غیر ملکی حمایت یافتہ دہشت گردی کے ناسور کا مکمل خاتمہ کیا جا سکے۔