خیبر پختونخوا کے ضلع ملاکنڈ میں سوات موٹروے کے ٹنل نمبر 3 کے قریب ایک انتہائی افسوسناک ٹریفک حادثے میں ٹرک الٹنے کے باعث کم از کم 15 افراد جاں بحق اور 8 زخمی ہو گئے ہیں۔ جاں بحق ہونے والوں اور زخمیوں میں مرد، خواتین اور معصوم بچے بھی شامل ہیں۔
ریسکیو 1122 ملاکنڈ کے ترجمان کے مطابق حادثے کی اطلاع ملتے ہی ریسکیو کی میڈیکل ریسپانس ٹیمیں ایمبولینسز کے ہمراہ فوری طور پر جائے حادثہ کی جانب روانہ ہو گئیں۔ جائے وقوعہ پر موٹروے پولیس اور ان کا عملہ بھی موجود تھا جنہوں نے فوری طور پر امدادی سرگرمیاں شروع کر دیں۔
موٹروے پولیس اور ریسکیو 1122 کی ٹیموں نے مشترکہ کارروائی کے دوران تمام متاثرہ افراد کو ملبے سے نکالا ہے۔ بعض زخمیوں اور لاشوں کو موٹروے پولیس کی گاڑیوں کے ذریعے، جبکہ دیگر کو ریسکیو 1122 کی ایمبولینسز کے ذریعے فوری طور پر ڈی ایچ کیو ہسپتال بٹخیلہ منتقل کیا گیا۔
ہسپتال ذرائع کے مطابق، ڈاکٹروں نے 15 افراد کے جاں بحق ہونے کی تصدیق کی جبکہ 8 زخمیوں کو فوری طبی امداد فراہم کی گئی۔ ان زخمیوں میں سے چار کی حالت تشویشناک بتائی جاتی ہے، جنہیں مزید علاج کے لیے سوات ریفر کر دیا گیا ہے۔
ابتدائی تحقیقات میں یہ بات سامنے آئی ہے کہ تمام متاثرین کا تعلق ضلع سوات کی تحصیل بحرین کے علاقے گبرال سے تھا۔ یہ خاندان ایک خانہ بدوش قبیلے سے تعلق رکھتا تھا اور موسمی نقل مکانی کے سلسلے میں مختلف علاقوں میں سفر کر رہا تھا۔
ریسکیو 1122 ملاکنڈ کے ترجمان نے کہا کہ حادثے کی نوعیت انتہائی سنگین تھی، تاہم ریسکیو 1122 ملاکنڈ کی پیشہ ورانہ اور بروقت کارروائی کے باعث قیمتی جانوں کو بچانے اور مزید جانی نقصان سے بچاؤ ممکن ہوا۔ حادثے کی وجوہات جاننے کے لیے تحقیقات شروع کر دی گئی ہیں۔
