وفاقی وزیر داخلہ محسن نقوی نے کیڈٹ کالج وانا کا دورہ کیا اور کالج پر حملے کی کوشش کو ناکام بنانے پر پاک فوج اور ایف سی کے افسروں اور جوانوں کی بہادری کو خراج تحسین پیش کیا ہے۔
کالج آمد پر آئی جی فرنٹیئر کور خیبر پختونخوا (جنوبی) میجر جنرل مہر عمر خان نے وزیر داخلہ کا استقبال کیا ہے۔ وزیر داخلہ کو اس موقع پر شدت پسندوں کا حملہ ناکام بنانے اور تمام کیڈٹس اور اساتذہ کو بحفاظت ریسکیو کرنے کے عمل پر تفصیلی بریفنگ دی گئی۔
وزیر داخلہ محسن نقوی نے حملے کی شدید مذمت کرتے ہوئے حملہ آوروں کو سخت الفاظ میں تنقید کا نشانہ بنایا۔ انہوں نے کہا کہ کیڈٹ کالج پر حملہ کرنے والے درندے ہیں جن کا انسانیت سے کوئی تعلق نہیں۔ ان کا مزید کہنا تھا کہ "کوئی مذہب بچوں کو نشانہ بنانے کی اجازت نہیں دیتا اور ان درندوں کا کوئی مذہب نہیں ہے۔ ان کو انسان کہنا انسانیت کی توہین ہے۔”
محسن نقوی نے کیڈٹس اور اساتذہ کو کامیابی سے بچانے پر پاک فوج اور ایف سی کے جوانوں کی جرات اور پیشہ وارانہ مہارت کو سراہا۔ انہوں نے کہا کہ پاک فوج اور ایف سی نے تمام طلبا اور ٹیچرز کو بحفاظت ریسکیو کر کے بہادری اور پروفیشنل ازم کی اعلیٰ مثال قائم کی ہے۔
انہوں نے کہا کہ دشمن کا مقصد یہاں سانحہ اے پی ایس جیسی خوفناک کارروائی کرنا تھا، جسے پاک فوج کے دلیر جوانوں نے بروقت کارروائی کرتے ہوئے ناکام بنا دیا اور ان خوارجیوں کو جہنم واصل کرکے سازش ناکام بنائی۔ وزیر داخلہ نے ریسکیو میں شامل تمام اہلکاروں کو قوم کا ہیرو قرار دیا۔
وزیر داخلہ محسن نقوی نے اس عزم کا اظہار بھی کیا کہ کیڈٹ کالج وانا کی بہترین انداز میں تزئین و آرائش کی جائے گی۔
