خیبر پختونخوا  کے ضلع اورکزئی میں سیکیورٹی فورسز اور دہشتگردوں کے درمیان ایک بڑا اور شدید فائرنگ کا تبادلہ ہوا جس کے نتیجے میں فرنٹیئر کور (ایف سی) کے 6 بہادر جوانوں نے جام شہادت نوش کیا۔ سیکیورٹی ذرائع کے مطابق یہ حملہ اپر اورکزئی کے ماموزئی علاقے میں ہلکی کڈہ پر واقع سیکیورٹی پوسٹ کو نشانہ بنا کر کیا گیا۔

سیکیورٹی ذرائع نے تصدیق کی ہے کہ سیکیورٹی فورسز اور دہشتگردوں کے درمیان یہ فائرنگ کا تبادلہ تقریباً 2 گھنٹے تک جاری رہا۔ اس شدید فائرنگ کے تبادلے میں اورکزئی اسکاؤٹس فرنٹیئر کور کے 6 جوان شہید اور 6 دیگر زخمی ہوئے ہیں۔

دہشتگردوں کے خلاف بہادری سے لڑتے ہوئے شہادت کا رتبہ پانے والے ایف سی کے 216 ونگ کے جوانوں کی شناخت درج ذیل ہے:

1. حوالدار عبدالرحمن
2. نائیک عظیم شکور
3. سپاہی امتیاز
4. سپاہی فیاض
5. سپاہی عبدالبصیر
6. سپاہی کامل شاہ

زخمی ہونے والے 6 جوانوں کو فوری طور پر علاج کے لیے قریبی اسپتال منتقل کر دیا گیا ہے جہاں انہیں طبی امداد فراہم کی جا رہی ہے۔

سیکیورٹی ذرائع کا کہنا ہے کہ فرنٹیئر کور کے جوانوں کی جوابی فائرنگ سے متعدد دہشتگرد ہلاک ہوئے ہیں۔ علاقے میں کسی بھی باقی ماندہ دہشتگرد کی موجودگی کو ختم کرنے کے لیے سرچ آپریشن جاری ہے۔

واضح رہے کہ اورکزئی میں گزشتہ کئی دنوں سے دہشتگردوں کے خلاف وسیع پیمانے پر آپریشن جاری ہے۔ سیکیورٹی ذرائع کے مطابق، اس جاری آپریشن کے سلسلے میں اب تک 40 خوارج (دہشتگرد) ہلاک ہو چکے ہیں۔ تاہم قوم کے لیے اس جدوجہد میں بھی بھاری قربانیاں دی گئی ہیں۔ جاری آپریشن میں اب تک لیفٹیننٹ کرنل سمیت 22 جوان شہید ہو چکے ہیں۔

سیکیورٹی فورسز کا عزم ہے کہ وہ ملک سے دہشتگردی کی لعنت کو مکمل طور پر ختم کر کے دم لیں گے اور وطن کے دفاع میں دی گئی یہ عظیم قربانیاں رائیگاں نہیں جائیں گی