پنجاب کے کاؤنٹر ٹیررازم ڈیپارٹمنٹ (سی ٹی ڈی) کے ایک خفیہ اطلاع کی بنیاد پر کیے گئے آپریشن میں دہشت گردوں کے ایک بڑے منصوبے کو ناکام بنا دیا گیا۔
سی ٹی ڈی کی جانب سے جاری کردہ بیان کے مطابق جمعہ کی رات کو سی ٹی ڈی نے لاہور کے نزدیک برکی روڈ پر دہشت گردوں کی موجودگی کی اطلاعات پر انٹیلی جنس پر مبنی آپریشن کیا۔ تاہم سی ٹی ڈی اہلکاروں کی آمد پر مشتبہ افراد نے فائرنگ شروع کر دی۔
فائرنگ کے تبادلے کے نتیجے میں ایک دہشت گرد زخمی ہو گیا جو موقع سے فرار ہونے میں کامیاب ہو گیا۔ تاہم دوسرے خودکش بمبار دہشت گرد کو پکڑ لیا گیا۔
پکڑے گئے دہشت گرد سے ایک خودکش جیکٹ، سیفٹی فیوز تار اور دھماکا خیز مواد برآمد ہوا۔ خودکش حملہ آور کی شناخت حافظ شمس کے نام سے ہوئی جو کالعدم تحریک طالبان پاکستان سے وابستہ ہے۔
واقعے کے بعد پولیس اہلکاروں نے علاقے میں پہنچ کر دوسرے دہشت گرد کو گرفتار کرنے کے لیے آپریشن شروع کردیا۔
حکام کا کہنا ہے کہ دہشت گرد لاہور میں ایک بڑے پیمانے پر حملے کی منصوبہ بندی کر رہے تھے۔ اس واقعے کے بعد مقدمہ درج کر لیا گیا ہے۔
کالعدم تحریک طالبان پاکستان (ٹی ٹی پی) نے اس منصوبے کی ذمہ داری قبول کر لی ہے۔
