بلوچستان کے ضلع ہرنائی میں جمعہ کے روز ایک سڑک کنارے نصب بم دھماکے میں کم از کم 10 مزدور ہلاک اور 6 زخمی ہو گئے۔

واقعہ ہرنائی کے علاقے شاہرگ میں کوئلے کی کانوں کے علاقے پی ایم ڈی سی 94 میں پیش آیا۔  کوئلے کی کان میں کام کرنے والے مزدور ایک پک اپ ٹرک میں سوار تھے جب وہ دھماکے کا شکار ہو گئے۔

لیویز ذرائع کے مطابق سڑک کے کنارے دیسی ساختہ بم نصب کیا گیا تھا جہاں سے گاڑی گزرنے والی تھی۔ ہرنائی کے ڈپٹی کمشنر حضرت ولی آغا کے مطابق گاڑی میں کل 17 مزدور سوار تھے۔

ہلاک اور زخمی افراد کو شاہرگ کے بنیادی صحت یونٹ منتقل کر دیا گیا۔ ضلعی انتظامیہ کے مطابق زیادہ تر ہلاک شدگان خیبر پختونخوا کے علاقے سوات اور شانگلا سے تعلق رکھتے ہیں۔

حملے کی ذمہ داری اب تک کسی نے قبول نہیں کی ہے۔ بلوچستان کے وزیر اعلیٰ سرفراز بگٹی نے حملے کی مذمت کی ہے اور تحقیقات کا آغاز کر دیا گیا ہے۔

یاد رہے کہ گزشتہ سال اکتوبر میں ضلع دکی میں مسلح حملہ آوروں کے حملے میں کم از کم 20 کان کن ہلاک ہو گئے تھے۔ حملہ آوروں نے حملے میں کان کنی کی مشینری کو بھی تباہ کر دیا تھا۔