خیبر پختونخوا (کے پی) حکومت کی جانب سے 12 نومبر کو منعقد کیے گئے جرگہ کے اعلامیہ میں ایک اہم نکتہ پولیس اور محکمہ انسداد دہشت گردی (سی ٹی ڈی) کی اندرونی سلامتی کی قیادت کا بھی تھا۔ تاہم، تجزیہ کاروں اور میڈیا رپورٹس کے مطابق، خیبر پختونخوا حکومت کے پاس موجودہ دہشت گردی کے خلاف مضبوط اقدامات اٹھانے کے لیے نہ تو کافی مالی وسائل ہیں اور نہ ہی مناسب تربیت۔

بڑھتی دہشت گردی اور پولیس کا کردار

صوبہ خیبر پختونخوا کے قبائلی اور جنوبی اضلاع میں دہشت گردی کے واقعات دن بہ دن بڑھتے جا رہے ہیں۔ پولیس دیگر سیکیورٹی فورسز کے ساتھ مل کر دہشت گردوں کے خلاف کارروائیاں کر رہی ہے جس سے انہیں ایک جانب جنگ میں عملی تربیت ملتی ہے تو دوسری جانب دیگر سیکیورٹی فورسز کا تعاون بھی حاصل ہوتا ہے۔

خیبر پختونخوا پولیس کے ایک سابق ایڈیشنل انسپکٹر جنرل پولیس (اے آئی جی پی) نے اپنے ذاتی خیال کا اظہار کرتے ہوئے کہا کہ موجودہ حالات میں اگر پولیس کی پالیسی شفٹ نہ ہوئی تو انہیں جتنے بھی ہتھیار دے دیے جائیں ان کی تربیت اتنی نہیں کہ وہ فرنٹ لائن پر دہشت گردوں کا مقابلہ کر سکیں۔

ان کا مزید کہنا تھا: "اگر انہیں ٹینک، توپیں اور طیارے تک بھی دے دیے جائیں تو بھی یہ روک تھام نہیں ہو سکتی کیونکہ یہ علاقہ بارڈر کا ہے اور وہ اس طرح مقابلہ نہیں کر سکیں گے۔”

سابق اے آئی جی پی نے اس بات پر زور دیا کہ دہشت گردی کو روکنا فوج کا کام ہے یا پھر فوج پولیس کو اتنی تربیت دے کہ ان کی صلاحیت پیدا ہو جائے کہ وہ دہشت گردی کے خلاف جنگ لڑ سکیں۔ انہوں نے ایک اور اہم نکتہ اٹھایا کہ "اگر افغانستان کے ساتھ جاری مسائل حل ہو جائیں (یعنی دہشت گردوں کی روک تھام ہو جائے) تو پولیس کے لیے دہشت گردی کا مقابلہ کرنا آسان ہو جائے گا۔”

اس کے برعکس خیبر پختونخوا پولیس کے ایڈیشنل انسپکٹر جنرل پولیس (اے آئی جی پی) محمد علی باباخیل نے میڈیا کو بتایا کہ حالیہ دنوں میں خیبر پختونخوا پولیس نے کئی ایسی کارروائیاں کی ہیں جن سے یہ ظاہر ہوتا ہے کہ پولیس اور سی ٹی ڈی میں دہشت گردی کی روک تھام کے لیے مکمل صلاحیت موجود ہے۔

خیبر پختونخوا پولیس کو جدید ہتھیاروں کی فراہمی

خیبر پختونخوا (کے پی) پولیس کی صلاحیت کو بڑھانے اور اسے جدید دور کے پولیسنگ معیارات کے مطابق لانے کی کوششیں جاری ہیں۔ اس سلسلے میں انسپکٹر جنرل پولیس (آئی جی پی) ذوالفقار حمید نے پشاور میں سینٹرل پولیس آفس میں منعقدہ ایک خصوصی تقریب کے دوران افسران کو جدید ٹیکنالوجی کا سامان تقسیم کیا ہے۔

آئی جی پی نے صوبے کے تمام اضلاع کی پولیس یونٹس کو 147 SKUA دوربینیں اور 363 TWS Hawk دوربینیں (جو تھرمل ٹیکنالوجی سے لیس ہیں) کے ساتھ ہتھیاروں پر نصب نشانے بھی تقسیم کیے۔ اس کے علاوہ، 10 جدید M249 ہیوی مشین گنیں اور 4 جدید اینٹی ڈرون گنیں بھی کلیدی علاقوں میں سیکیورٹی فورسز کو مضبوط بنانے کے لیے فراہم کی گئیں۔

نئی فراہم کردہ تھرمل دوربینیں اور ہتھیاروں پر نصب نشانے پولیس کی رات کے وقت نگرانی اور ردعمل کی صلاحیت کو بہت بڑھا دیں گی۔ یہ آلات مکمل اندھیرے میں دور سے انسانی نقل و حرکت کا پتہ لگا سکتے ہیں اور چار کلومیٹر تک گاڑیوں کی شناخت کر سکتے ہیں، اس بات کو یقینی بناتے ہوئے کہ کوئی مشکوک حرکت نظر انداز نہ ہو۔

اینٹی ڈرون اور ہیوی مشین گنوں کی تعیناتی

جدید EMG-300 اینٹی ڈرون گنیں شمالی وزیرستان، باجوڑ اور بنوں میں پولیس کو فراہم کی گئی ہیں تاکہ وہ دہشت گردوں کی ممکنہ ڈرون دھمکیوں کا مؤثر طریقے سے مقابلہ کر سکیں۔ اسی طرح M249 ہیوی مشین گنیں ریپڈ رسپانس فورس (آر آر ایف) اور ایلیٹ فورس یونٹس کو دی گئی ہیں تاکہ دہشت گردی کے خلاف کارروائیوں کے دوران ان کی لڑائی کی تیاری مضبوط ہو۔

قبائلی اضلاع کے پولیس کے مسائل اور فنڈز کا استعمال

پولیس فورس کو درپیش ایک بڑا چیلنج تعلیم کا فقدان ہے۔ دستاویزات سے پتہ چلتا ہے کہ 2022 اور 2023 میں ان اضلاع میں پولیس فورس کا 60 فیصد اہلکار ناخواندہ تھا۔

حال ہی میں 1,000 نئے افسران بھرتی کیے گئے جن میں 35 خواتین بھی شامل ہیں۔ منصوبہ ہے کہ خواتین افسران کی کل تعداد 135 تک بڑھائی جائے۔ ان نئے بھرتی ہونے والوں اور سابق خاصہ دار اہلکاروں کی تربیت جاری ہے، پولیس دستاویزات کے مطابق 2024 تک 10,000 نئے اہلکاروں کی تربیت مکمل ہو چکی تھی۔

تجزیہ کاروں کا کہنا ہے کہ پہلے صوبائی حکومت کو پولیس کو دیے جانے والے فنڈز کے استعمال اور پولیس کے مسائل حل کرنے چاہئیں کیونکہ یہ صوبائی حکومت کی ذمہ داری کے دائرے میں آتا ہے اور این ایف سی ایوارڈ میں سیکیورٹی کے لیے ایک فیصد حصہ بھی دیا جاتا ہے۔ تجزیہ کاروں کا کہنا ہے کہ اگر یہ فنڈ صحیح طریقے سے خرچ کیا جائے تو پولیس کے مسائل بڑی حد تک حل ہو سکتے ہیں۔