فیڈرل انویسٹی گیشن ایجنسی (ایف آئی اے) کمپوزٹ سرکل گوادر نے بڑی کارروائی کرتے ہوئے غیر قانونی طور پر سمندر کے راستے ایران جانے کی کوشش کرنے والے 29 افراد کو گرفتار کر لیا ہے۔ گرفتار ہونے والوں میں ایک ایرانی شہری بھی شامل ہے۔

ایف آئی اے کے ترجمان کے مطابق، ان ملزمان کو جیوانی کے علاقے سے گرفتار کیا گیا جب وہ سمندری راستے سے پاکستان سے ایران جا رہے تھے۔ ابتدائی تفتیش سے معلوم ہوا ہے کہ یہ ملزمان ایران سے مزید غیر قانونی طور پر دوسرے ممالک جانا چاہتے تھے۔

اطلاعات کے مطابق گرفتار ہونے والے ملزمان کا تعلق پاکستان کے مختلف شہروں سے ہے۔ ان میں 6 کا تعلق بنوں، 4 کا فیصل آباد، 5 کا مالاکنڈ، 4 کا ملتان اور خانیوال، اور 2 کا بونیر سے ہے۔ اس کے علاوہ، دیگر ملزمان حافظ آباد، وزیرستان، وزیر آباد اور کراچی کے رہائشی ہیں۔
ایف آئی اے نے تمام ملزمان کے خلاف مقدمات درج کر کے مزید تفتیش شروع کر دی ہے۔ یہ کارروائی انسانی اسمگلنگ کے خلاف جاری آپریشن کا حصہ ہے۔