جمعرات کے روز پختونخوا کے قبائلی ضلع باجوڑ کے تحصیل خار میں نامعلوم دہشت گردوں کی فائرنگ سے مولانا خانزیب اور ایک سکواڈ کنسٹیبل شیرزادہ موقع پر جاں بحق ہو گئے جبکہ تین دیگر افراد شدید زخمی ہوئے ہیں۔ یہ واقعہ گزشتہ روز پیش آیا جب مولانا خانزیب امن پاسون کمپین سے فارغ ہو کر ایک گاڑی میں سوار افراد نواگئی اپنے گھر جا رہے تھے۔
اطلاعات کے مطابق باجوڑ کے تھانہ خار کے ایس ایچ او رشید خان کی جانب سے انسداد دہشتگردی ڈیپارٹمنٹ باجوڑ کے افسر انچارج کو بھیجے گئے ایک تحریری مراسلے کے مطابق، یہ واقعہ اس وقت پیش آیا جب مولانا خانزیب ولد ستانہ گل سکنہ نواگئی اپنے ساتھیوں شاہ سوار ولد جان باچہ، عثمان ولد سید الرحمن، سکارڈ کنسٹیبل شیرزادہ اور ڈرائیور محمد طارق ولد عبدالکریم کے ہمراہ اپنی ذاتی گاڑی CHR/NCP سفید رنگ میں خار سے نواگئی جا رہے تھے۔ جب وہ بالا کے مقام پر پہنچے تو پہلے سے موجود نامعلوم دہشت گردوں نے ان پر فائرنگ کر دی۔
فائرنگ کے نتیجے میں مولانا خانزیب اور سکواڈ کنسٹیبل شیرزادہ کو جسم کے متعدد حصوں پر گولیاں لگیں اور وہ موقع پر ہی جاں بحق ہو گئے۔ جبکہ شاہ سوار ولد جان باچہ، عثمان ولد سید الرحمن اور ڈرائیور محمد طارق ولد عبدالکریم بھی جسم کے مختلف حصوں پر گولیاں لگنے سے شدید زخمی ہوئے۔ فائرنگ سے گاڑی کو بھی شدید نقصان پہنچا ہے۔
مقتولین اور زخمیوں کو فوری طور پر خار ہیڈکواٹر ہسپتال منتقل کیا گیا ہے۔ ہسپتال کے کیجولٹی انچارج کو مقتولین کے کاغذات مرگ مرتب کرنے اور زخمیوں کے نقشہ اضرار بنانے کی اطلاع دی گئی ہے۔
اس واقعے کے بعد نامعلوم دہشت گردوں کے خلاف مقدمہ درج کر لیا گیا ہے اور تفتیش انسپکٹر فلک ناز خان کے حوالے کر دی گئی ہے۔ افسران بالا کو بھی اس واقعہ کی اطلاع دے دی گئی ہے۔
گزشتہ کچھ عرصہ سے دہشت گرد مسلسل سرحد پار سے سیاسی قائدین اور فورسز کو نشانہ بنا رہے ہیں۔
