وزیر دفاع خواجہ آصف نے بدھ کے روز سوشل میڈیا پر ان کے استعفیٰ کے حوالے سے گردش کرنے والی افواہوں کی واضح طور پر تردید کرتے ہوئے ان دعوؤں کو "جعلی” اور "خواہش پر مبنی” قرار دیا ہے۔
خواجہ آصف کے مستعفی ہونے کے بارے میں قیاس آرائیاں اس وقت زور پکڑ گئیں جب زبیر علی خان کی جانب سے ایکس (سابقہ ٹوئٹر) پر ایک پوسٹ میں یہ دعویٰ کیا گیا کہ وزیر دفاع نے وزیراعظم ہاؤس کے مشیر ڈاکٹر توقیر شاہ کو اپنا استعفیٰ جمع کرایا ہے۔ اس ایکس پوسٹ میں مزید کہا گیا کہ خواجہ آصف ایک میٹنگ کے لیے مری گئے تھے اور اس کے بعد سے ان کا فون بند ہونے کی وجہ سے ان سے رابطہ نہیں ہو پا رہا تھا۔
وزیر دفاع خواجہ آصف نے فوری ردعمل دیتے ہوئے ایکس پر ان دعوؤں کو مسترد کیا اور لکھا، "معذرت کے ساتھ، اس صاحب نے اپنی خواہشات اس ٹویٹ میں لکھی ہیں۔ یہ حقیقت نہیں۔” انہوں نے وائرل پوسٹ کا اسکرین شاٹ بھی شیئر کیا جس پر "جعلی” کی مہر لگی ہوئی تھی۔
یہ افواہ آصف کے حالیہ ریمارکس کے بعد سامنے آئی تھی جس میں انہوں نے سینئر بیوروکریٹس پر پرتگال میں جائیدادیں خریدنے اور مبینہ طور پر وہاں منتقل ہونے کا الزام لگایا تھا، ان تبصروں نے سیاسی حلقوں میں نئی بحث چھیڑ دی تھی۔
خواجہ آصف اپنے وزیر دفاع کے کردار میں سرگرم ہیں اور کابینہ ڈویژن نے اس کے برعکس کوئی نوٹیفکیشن جاری نہیں کیا۔
