د اوږدې مودې ځنډ وروسته، د خیبر پښتونخوا وزیراعلیٰ سهیل آفریدی بالاخره د جمعې په ورځ خپله صوبایي کابینه اعلان کړه. په کابینه کې لس وزیران، دوه سلاکاران او یو ځانګړی مرستیال شامل دي. د لوړې مراسم به نن ماسپښین درې بجې د ګورنر هاوس په ودانۍ کې ترسره شي.
د وزیراعلیٰ لهخوا وروستي شوي وزیران دا دي: مینه خان آفریدی، ارشد ایوب خان، امجد علي، آفتاب عالم خان، فضل شکور خان، خلیق الرحمن، ریاض خان، سید فخر جهان، عاقب الله خان او فیصل خان.
سربېره پر دې، مزمل اسلم او تاج محمد د سلاکارانو په توګه ټاکل شوي، او شفیع جان د وزیراعلیٰ ځانګړی مرستیال ټاکل شوی دی. د کابینې د نوملړ سمري ته د خیبر پښتونخوا ګورنر فیصل کریم کنډي لاسلیک کړی دی.
د راپورونو له مخې، سهیل آفریدی چې د همدې میاشتې په پیل کې د وزیراعلیٰ په توګه ټاکل شوی و، غوښتل یې تر هغه خپل ټیم اعلان نه کړي څو د تحریک انصاف له بنسټاېښودونکي عمران خان سره وګوري. خو له دې امله چې دا لیدنه ونه شوه، د عمران خان خور ورته د کابینې د جوړښت لپاره مکمل واک ورکړ.
په همدې حال کې، د کابینې د اعلان په ځنډ د اپوزېشن استازو لهخوا دوامدار انتقادونه کېدل. هغوی ادعا کوله چې د حکومتي چارو ځنډ د صوبې د بحران سبب ګرځېدلی او د بېړني حالت د اعلان اندېښنه یې هم څرګنده کړې وه.
د تحریک انصاف صوبایي مشرتابه ویلي چې هغه پخواني وزیران چې د فساد یا بدنامۍ تورونه پرې دي، په نوې کابینه کې به ځای ونهلري.
