د پنجاب پي ډي ایم اي وايي چي په لاهور، راولپنډۍ او ګوجرانواله کښې د سختو بارانونو وروسته د ښاري سیلابونو راتلو خبرداری ورکړی دی.
دا خبرداری وروسته له هغې ورکړل شو چې په راولپنډۍ کښې د باران بیړنی حالت اعلان شو. چیرې چې ۸۰ ملي میټره باران او په اسلام آباد کښې په سیدپور سیمه کښې ۹۰ ملي میتره باران ثبت شوی دی. ګولړه او بوکړه کښې په ترتیب سره ۳۰ ملي میتره او ۳۲ ملي میټره باران شوی دی.
د PDMA ډایرکټر جنرل تمه لري چې په راتلونکو ۲۴ ساعتونو کښې به په قصور، شیخوپوره او سیالکوټ په څېر نورو ښارونو کښې هم نور سخت بارانونه وشي. د چناب، جهلم او راوي سیندونو په اوږدو کښې هم د سیلابونو راتلو تمه کیږي. تمه ده چې دغه درانه موسمي بارانونه به د جولای تر ۳۱مې نیټې پورې دوام وکړي.
دا خبرداری په پاکستان کښې د سختو موسمي بارانونو وروسته ورکړل شوی. چې له امله یې د ناڅاپي سیلابونو او ځمکې ښویدنې په پایله کښې لږ تر لږه ۲۷۹ کسان مړه شوي دي. پنجاب تر ټولو ډیر زیانمن شوی چیري چې ۱۵۰ کسان مړه شوي او ۵۳۰ تنه ټپیان شوي دي.
خیبر پښتونخوا لږ تر لږه ۶۴ مړینې او ۸۰ ټپیان، سند ۲۰ مړینې او ۴۰ ټپیان، او بلوچستان ۲۰ مړینې او ۴ ټپیان راپور ورکړی دی. د پاکستان د هوا پېژندنې څانګې (PMD) د جولای تر ۳۱مې پورې د سختو بارانونو وړاندوینه کړې ده.
