د متحده ایالاتو ولسمشر ډونلډ ټرمپ په “ټرومپ سوشل” کې د اعلانونو داسې لړۍ خپره کړې چې ښايي د امریکا د کډوالۍ تګلاره په بشپړه توګه بدله کړي. هغه ویلي چې د دریمې نړۍ له ټولو هېوادونو څخه به کډوالۍ په مستقل ډول بنده کړي، څو امریکایي نظام ته د بشپړې بیا رغونې چانس ورکړل شي. ټرمپ ټینګار کړی چې بې‌کنتروله کډوالۍ د امریکا ټولنه کمزورې کړې او د دولت پر سرچینو یې دروند فشار اچولی دی.

ټرمپ څرګنده کړې چې د دریمې نړۍ له هېوادونو څخه د نوو کډوالو راتګ به تر هغه وخته بند وي، څو چې سیستم بېرته ثابت او با ثباته نه شي.

ولسمشر د هغو کډوالو د ایستلو لپاره چې د هېواد امنیت ته ګواښ پېښوي یا له لوېدیځ تمدن سره سمون نه لري، د “برعکس کډوالۍ” (reverse migration) غوښتنه کړې ده.

هغه زیاته کړې چې د هغو کډوالو تابعیت به لغوه کېږي چې د هېواد امنیت کمزوری کړي، او هغه بهرنیان به وشړل شي چې د عامه بار، امنیتي خطر په توګه پېژندل کېږي یا د هیواد د ارزښتونو او مینې وړتیا نه لري.

د ولسمشر د فرمان له مخې، د USCIS رییس جوزف اېډلو اعلان کړی چې د ۱۹ هېوادونو (په شمول د افغانستان، هایتي، ایران، سومالیا او وینزویلا) د ټولو ګرین کارډونو به بشپړه او سخت بیا کتنه کېږي، چې دا به د میلیونونو دایمي اوسېدونکو لپاره جدي اندېښنې راولاړوي.

د سپینې ماڼۍ ته نږدې د ملي ګارد د دوو سرتېرو د ډزو تر پېښې وروسته، د افغان اتباعو د کډوالۍ ټولو غوښتنلیکونو پروسس سمدستي درول شوی دی. د بریدګر رحمان الله لاکانوال د خوست ولایت اوسېدونکی و، او ټرمپ ادعا کړې چې نوموړی د بایډن دورې د پالیسیو له مخې امریکا ته داخل شوی و.

ټرمپ همدارنګه ویلي چې بهرنیانو ته ټول فدرالي امتیازات او سبسایډۍ ختمېږي.

ولسمشر کډوالۍ د هېواد تر ټولو ستر امنیتي ګواښ بللی او ټینګار یې کړی چې هدف یې د غیرقانوني او ګډوډو نفوسونو په لویه کچه کمول دي. د دغو فرمانونو له امله په امریکا کې مېشت میلیونونه کورنۍ او هغه کسان چې له بهر څخه د امریکا د راتګ تمه لري، د سخت نامعلوم وضعیت سره مخ کېدای شي.