پاکستان او جاپان د فرورۍ په ۲۶مه په ټوکیو کښې د ترهګرۍ پر ضد خپله څلورمه مشوره وکړه او د ترهګرۍ سره د مبارزې لپاره یې خپله ژمنه بیا تکرار کړه.
د پاکستاني پلاوی مشري اضافي سکرټری (ملګرو ملتونو) نبیل منیر کوله، او د جاپاني پلاوي مشري سفیر مینامي هیرویوکي (د ترهګرۍ او نړیوالو تنظیم شوي جرمونو سره د مبارزې لپاره د نړیوالې همکارۍ مسؤل) کوله، او د ترهګریزو ګواښونو په اړه یې خبرې اترې وکړې.
د بهرنیو چارو وزارت د یوې اعلامیې له مخې، په مشورو کښې د ملي او سیمه ییزو ترهګریزو ګواښونو بیاکتنه وشوه، او دواړو خواوو په ټولو اړخونو کښې د ترهګرۍ سره د مبارزې لپاره خپله اراده څرګنده کړه. پاکستاني پلاوي د وروستیو پالیسیو بدلونو او د تطبیق شوو اقداماتو په اړه وضاحتونه ورکړل، په ځانګړې توګه د ترهګرۍ د تمویل سره د مبارزې، د ترهګریزو ډلو له منځه وړلو او د سرحدي امنیت د پیاوړتیا په برخه کښې پرمختګونه روښانه کړل.
په راتلونکي کښې دواړو هیوادونو د ظرفیت لوړولو پروګرامونو او نوښتګرو ټیکنالوژیکي حل لارو په ګډون د دوه اړخیزې همکارۍ د پیاوړتیا لارې چارې وڅیړلې.
دا غونډه په وروستیو ورځو کښې له ترکیې، انګلستان او اروپايي اتحادیې سره د ورته غونډو په تعقیب ترسره شوه.
