پاکستان د پنجاب پولیسو او د (CTD) لوړ پوړو چارواکو نن یوه گډه خبري غونډه وکړه او په دې ترڅ کښې یې د RAW ترهگرو د یوې سترې ترهگرۍ نقشې شنډولو کښې د پام وړ پرمختگ اعلان وکړ.
د پنجاب د عملیاتو اضافي آی جي شهزاده سلطان او د پنجاب د CTD عملیاتو ایس ایس پي وقار عظیم د عملیاتو یلغار په نوم د دغه عملیاتو جزیات ورکړل. چې په ترڅ کښې یې د هند د استخباراتي ادارې (RAW) لخوا مرسته شوې نیټ ورک افشا شو. د دغو عملیاتو په پایله کښې په پنجاب کښې د RAW لپاره د شپږو اسانتیاو برابرونک کسان نیول شوي دي.
چارواکو په ټوبه ټیک سنگه کښې زیاته اندازه چاودیدونکي توکي او د چاودنې وسایل ضبط کړل او په بهاولپور کښې یې د RAW یو اسانتیا برابرونکی کس ونیو. چې له دوبۍ څخه یې پیسې تر لاسه کولې. سربیره پر دې په بهاولنگر کښې دوه کسان د هند د سرحدي امنیتي ځواک (BSF) څخه په مستقیم ډول د لاسي جوړو شویو چاودیدونکو توکو (IEDs) تر لاسه کولو په تور ونیول شول.
CTD په بهاولپور کښې په یوه جومات او یوه ریلوې سټیشن باندې پلان شوي بریدونه په بریالیتوب سره شنډ کړل. په ځانگړې توگه د RAW افسرانو میجر رویندر راټور او انسپکټر سنگهـ ترمنځ د خبرو اترو غږیزې ثبتونې تر لاسه شوې. چې مهم شواهد وړاندې کوي.
ضبط شویو موادو کې IEDs، سیفټي فیوز او طبقه بندي شوي نقشې شاملې وې. چې د پاکستان دننه په حساس ځایونو کښې د هدف مندو وژنو او بریدونو لپاره د ترهگرو پلانونه یې تایید کړل. خبري غونډې د سرحد هاخوا ترهگرۍ څخه د رامینځته شوي جدي گواښ باندې ټینگار وکړ او د داسې گواښونو سره د مبارزې لپاره د پاکستاني قانون پلي کوونکو ادارو روانه ژمنه یې روښانه کړه.
په دوبۍ کښې میشت اسانتیا برابرونکی د ډي جي خان اوسیدونکی دی چې نوم یې ذوالفقار دی. د هغه په خلاف په بهاولپور کښې یوه قضیه ثبت شوې ده. درې د RAW لخوا سپانسر شوي ایجنټان په ټوبه ټیک سنگهـ کښې نیول شوي دي. چې نومونه یې اعظم، منصور او امجد دي.
په بهاولپور کښې په یو پټه حجره کښې دوه د RAW لخوا سپانسر شوي ترهگر اکبر علي او محمد اسلم نیول شوي دي. دوه هندي جوړ شوي IEDs ترې تر لاسه شوي دي.
په خبري کانفرنس کښې د سرحد سره نږدې د بهاولنگر ضلعي نقشه وښودل شوه. اضافي آی جی تشریح کړه چې IED د BSF دروازې له لارې لیږدول شوی وي. یو IED په بهاولپور کښې په جومات د برید لپاره او بل د ریلوې سټیشن برید لپاره ورکړل شوی و.
اضافي آی جي زیاته کړه چې د دغو ترهگرو د تمویل لپاره د پیسو مینځلو دوه لارې کارول شوې. یوه یې کریپټو کرنسي او بله یې بې بانکه بانکداري ده.
شهزاده سلطان زیاته کړه چي کله چې مونږ تحقیقات کوو نو پوهیږو چې په کوډ کلمه کښې خبرې کول ډیر لږ سلنه لري. هغه خلک چې مونږ یې نیسو ډیری وختونه د ادارو غړي نه وي. دوی یوازې عادي خلک یا مجرمین وي. دوی مسلکي استخباراتي چلونکي نه دي. د دوی ډیری خبرې غیر کوډ شوي او ډیرې عادي وي.
د پنجاب د ترهګرۍ ضد ادارې (CTD)، پولیسو او حکومت یوه ګډه خبري غونډه ترسره کړه. د دې غونډې موخه دا وه چې دا معلومات نه یوازې په پاکستان کښې بلکې بهر ته هم ورسېږي. ترڅو خلک په دې پوه شي چې څنګه یوه ځانګړې اداره په ترهګرۍ کښې لاس لري. د پاکستان حکومت دا مسله په رسمي ډول په ډېرو نړیوالو پلیټ فارمونو کښې پورته کړې او تمه ده چې دا ځل به هم هم داسې وکړي.
د پنجاب د CTD د عملیاتو مشر ایس ایس پي وقار عظیم وویل چې په ډیره غازي خان او میانوالي کښې روان عملیات له افغانستان څخه تمویل کیږي. هغه زیاته کړه چې په افغانستان کښې د هندي استخباراتي ادارې (RAW) هینډلر دغو عملیاتو ته پیسې ورکوي او روزنه یې هم ورکوي. هغه په دې کځې هیڅ شک نه درلود چې RAW په پاکستان کښې د ترهګرۍ د زیاتولو لپاره سختې هڅې کوي.
وقار عظیم دا هم وویل چې د RAW مختلفې نیټ ورک په پاکستان کښې فعالیت کوي. هغه محرم د پولیسو لپاره ترټولو مهمه امنیتي پیښه وبلله او ویې ویل چې د محرم لپاره پراخ او هر اړخیز انتظامات کیږي. CTD په دې کښې خپل ځانګړی رول لري. دوی د ګډوډۍ احتمالي سیمې په نښه کوي او د ترهګرۍ اړوند ګواښونه هم CTD لخوا چمتو کیږي. CTD ځانګړې څانګه او پولیس د محرم په جریان کښې خپل ځانګړي رولونه لري. CTD د ترهګرۍ ټول معلومات له IG سره شریکوي او بیا دا معلومات ولسوالۍ ته لیږدول کیږي. CTD د احتمالي ستونزو ارزونه هم کوي. په پنجاب کښې ۵۸۷ حساس ځایونه شتون لري. چې ډیری یې حل شوي او یوازې ۳۳ پاتې دي.
هغه زیاته کړه چې ټول نیول شوي کسان پاکستانیان دي، نه هندیان. هغه وویل چي دا پاکستانیان دي چې د RAW لپاره کار کوي او د RAW لخوا کنټرول کیږي. دا مجرمین په پاکستان کښې میشت وو او د پاکستان او منځني ختیځ ترمنځ یې سفر کاوه. مونږ د تحقیقاتو له لارې د دوی نومونه او نور معلومات ترلاسه کړل.
