د پاکستان او افغانستان ترمنځ د سرحدي خبرو دوهم مهم پړاو، چې موخه یې د وروستیو تاوتریخوالو پای ته رسول او د سولې د فضاء ټینګول دي، د شنبې په ورځ په ترکیه کې د استانبول ښار کې ترسره کېږي. دا خبرې د دوحې له لومړي پړاو وروسته کېږي چې په هغه کې بېړنی اوربند اعلان شوی و.
د پاکستان د دفاع وزیر خواجه آصف د شنبې په ورځ په سیالکوټ کې له خبریالانو سره په خبرو کې وویل، له افغانستان سره مذاکرات روان دي او ډېر ژر به یې پایلې څرګندې شي. خو هغه په څرګند ډول خبرداری ورکړ چې “که خبرې ناکامې شي، پاکستان د افغان سرحد په اوږدو کې د ښکاره جګړې لپاره بشپړ چمتووالی لري.”
خو خواجه آصف زیاته کړه چې د پاکستان وسلهوال ځواکونه د ترهګرۍ پر ضد مبارزه کوي او هېواد نږدې هره ورځ نوې وینې او قربانۍ ورکوي. هغه پر هند هم تور ولګاوه چې د افغانستان له خاورې د پاکستان پر ضد نیابتي جګړه پر مخ وړي.
د دې تر مخه خواجه آصف افغانستان په یوه ټلویزیوني مرکه کې “دشمن او ناسپاس هېواد” بللی و.
د بهرنیو چارو وزارت ویاند طاهر اندراهيب په خپل اونیز خبري بریفینګ کې د استانبول خبرو پخلی وکړ او ویې ویل چې موخه یې په هغو ټکو پرمختګ دی چې په دوحه کې پرې موافقه شوې وه.
هغه وویل، د ترهګریزو ګواښونو له امله د افغانستان سره د تګ راتګ لارې لنډمهاله تړل شوي دي او ټینګار یې وکړ چې “د یو عادي پاکستاني ژوند خونديتوب، د سوداګرۍ او خوراکي توکو تر لېږد ډېر ارزښت لري.”
اندراهيب له افغانستانه وغوښتل چې د خپلې خاورې د امنیت د کنټرول لپاره باور وړ او د تائید وړ ګامونه پورته کړي، ترڅو د پاکستان پر ضد بریدونه ودرېږي.
نوموړي همدارنګه وویل چې د دوحې له اوربنده وروسته کوم لوی سرحدي برید نه دی شوی، چې دا د خبرو یو مثبت پرمختګ ګڼل کېږي.
هغه زیاته کړه چې له دې وروسته به له افغانستانه پاکستان ته ټولې تګ راتګ رسیدنې یوازې د قانوني ویزو پر بنسټ ترسره کېږي، ترڅو سرحدي امنیت لا پیاوړی او مدیریت شوی وي.
